Politika, bashkë për integrimin

Në paraprirje të rekomandimit të Komisionit Europian për statusin, bashkarisht palët kanë inicuar edhe hartimin e një ligji të ri për monitorimin e procesit të integrimit nga Kuvendi, pasi ligji aktual daton në 2004 dhe neni i tij i parë është synimi i nënshkrimit të MSA-së.

“Në korrik ligji i vjetër bën 10 vjet dhe një ligj i tillë tregon që nuk ka gjetur zbatim. Që në nenin 1 të tij kuptohet se ai ka pushuar se funksionuari, sepse flet për procesin e MSA, në një kohë kur të gjithë shpresojmë që në fund të muajit Shqipëria do të jetë me status kandidat”, deklaroi nënkryetari i komisionit, Taulant Balla.

“Me marrjen e statusit, që është i vonuar sepse për ne është një vendim i kryer e që duhej marrë me kohë, Shqipëria do kalojë procese të tjera skrutinimi e monitorimi, që do të thotë se kur të vijë koha e tyre Kuvendi duhet të jetë më i përgatitur se sot. Prandaj, le ta mbështesim këtë ligj”, tha nga ana tjetër kryetarja e komisionit, Majlinda Bregu.

Ligji i ri, për të cilin është ftuar shoqëria civile të marrë pjesë në dhënien e mendimit, synohet të miratohet brenda këtij sesioni. Mesazhi i bashkëpunimit të palëve nga komisioni i integrimit i paraprin takimit të tretë të nivelit të lartë Shqipëri-BE, i cili do të zhvillohet paraditen e së mërkurës.

Në këtë takim, komisioneri Fyle në Tiranë do të lexojë edhe pjesë nga raporti që do t’u dërgohet vendeve anëtare për t’i orientuar në vendimin e tyre për statusin e Shqipërisë më 23 qershor.

Top Channel