Hetime italo-shqiptare për drogën

Sipas prokurorit të Antimafias së Leçes, Cataldo Motta, brigjet e Vlorës vijojnë të jenë korridori kryesor i trafikimit të marijuanës.

“Unë preferoj të mos flas për hetime që janë në zhvillim, por ne do të rrisim bashkëpunimin ndërkombëtar, ndërkohë që Shqipëria është shumë mirë e orientuar në këtë rrugë. Do të ketë një shkëmbim të vazhdueshëm informacionesh mbi hetimet që janë hapur si në Shqipëri edhe në Itali përsa i përket krahinës së Leçes. Dihet që Shqipëria ka kultivim të madh të saisve të lëndëve narkotike dhe që Shqipëria është një furnizues i madh. Edhe një fakt i njohur që Vlora është 44 milje larg Leçes, kështu që kuptohet që tregu i parë i shpërndarjes së marijuanës është Leçe”, deklaroi Motta.

I pyetur nga Top Channel, Motta nuk komentoi në lidhje me arrestimin e oficerit shqiptar të anti-drogës Dritan Zagani, i cili akuzohet se ka shpërdoruar detyrën duke përcjellë informacione të operacioneve policore për palën italiane. Por u shpreh se ka rritje të ndjeshme të sasive të kapura të lëndëve narkotike.

“Është rritur sekuestrimi, por jo aq sa është rritur sasia që ne mendojmë se hyn në Itali. Duhet të kemi parasysh që një sasi sillet nëpërmjet emigracionit të paligjshëm, por jo të gjitha ngarkesat që hyjnë janë për tregun italian. Ato janë të destinuara për në perëndim”, nënvizoi Motta.

Ndërkohë, prokurori i përgjithshëm Adriatik Llalla nuk hodhi dritë mbi deklaratën e tij më të hershme për dosje që janë nën hetim e që mund të ndikojnë në të ardhmen e vendit.

“Janë probleme shqetësuese për situatën, për krimin e organizuar, korrupsionin, trafikun e drogës. Kemi një proces hetimi që do të vazhdojë. Prokuroria normalisht që ka prova”, deklaroi Llalla.

Por a ka patur pala italiane informacione edhe për avionë të tjerë që trafikonin drogë përveç avionit të Divjakës? “Deri tani nuk rezulton një gjë e tilllë”, saktësoi prokurori i Antimafias, Motta.

Top Channel