Përse përdorej C4 e ushtrisë?
21/05/2014 00:00
Tentuan të korruptojnë policinë për të shmangur ndëshkimin, në pranga dy shtetas 15/09 11:27
Prokuroria e kryeqytetit po verifikon deklaratat e katër të arrestuarve të operacionit “Porosia”, të dhëna një ditë më parë përpara oficerëve të policisë, të cilët janë rrëfyer se 96 kilogramët e C4-s do ta përdornin për shpërthime në një gurore në Krujë.
“Ne nuk mund ta themi ende nëse sasitë e lëndës plasëse mund të përdoreshin në ngjarje kriminale apo nëse ka episode që mund të jenë përdorur më herët për ngjarje kriminale”, thanë pjesëtarë të grupit të hetimit.
Nëse do të konstatohet me prova një gjë e tillë, atëherë thanë burime të Prokurorisë, dosja do t’i kalojë për kompetencë Krimeve të Rënda. Por, duke qenë se deri më tani dyshimet kryesore kanë lidhje vetëm me ekzistencën e gurores dhe përdorimin e lëndës plasëse në gurore, dosja do të qëndrojë për hetim në Prokurorinë e kryeqytetit.
Deri më tani konfirmohet në rrugë jo zyrtare në referim të rrëfimit të të arrestuarve se lënda plasëse sigurohej në një repart ushtarak nga i akuzuari Ilir Dhimo me detyrë kapiten tek asgjesimi i municioneve. Ai u ka thënë hetuesve se lënda plasëse do shitej për një gurore për një person tjetër.
Operacioni u finalizua në datën 19 pas vëzhgimit nga GOS të njërit prej të dyshuarve, i cili pas një bisede me tre të tjerë në afërsi të zonës së Oxhakut në Tiranë, u pa teksa dilte më vonë nga banesa e tij me nje motorr, ndërsa kishte të mbështjellë në qese gati 11 kg tritol.
Pas kontrollit të banesave të të katër personave, u bllokua sasia e lëndës plasëse si edhe e ndezësave të minave, kapsollave detonatore, fitilit zjarr-përcjellës dhe percjellësve elektrikë.
Top Channel
