Avioni, akuzë për trafik droge

Mes veprimeve hetimore, prokurorja e çështjes, Doloreza Musabelliu, së bashku me oficerë të Policisë Gjyqësore, pritet të marrin të dhënat nga sistemi TIMS për të konfirmuar dyshimet nëse italiani Riformato ka hyrë herë tjetër në Shqipëri apo është hera e parë sikurse ai ka pretenduar në rrëfimin e tij përpara hetuesve.

Ndërkohë, nga të dhënat jo zyrtare, rezulton se i arrestuari tjetër Saimir Bajrami ka mbërritur nga Italia në Shqipëri dy javë më parë. Sipas deklaratës së tij të dhënë grupit të hetimit, ai kishte njohje të mëparshme me pilotin italian pasi ishin takuar në Vareze të Italisë. Unë, mësohet jozyrtarisht të ketë thënë Bajramaj, fola me pilotin për transport me avion për sasinë e drogës dhe do ta paguaja për transportin nga Shqipëria në Itali me 400 euro për kilogram.

Pas mbërritjes së pilotit në Shqipëri më 8 maj, ata janë takuar sërish në një lokal pranë aeroportit “Nënë Tereza”, ndërkohë që pikërisht në këtë vend është bërë përfundimisht edhe biseda dhe është rënë dakord për datën 10 maj si afat të dorëzimit të mallit, ndërkohë që burimet shtojnë se ulja e avionit sipas rrëfimit të Bajramajt do të bëhej po në Divjakë, pikërisht në vendin ku avioni pësoi defektin.

Bajramaj ka thënë se takimi në plazhin e Divjakës është caktuar për dorëzimin në orën 14.30, ku do të ngarkohej 460 kilogramë kanabis sativa, por edhe do të paguhej vetëm një pjesë e parave prej gati 28 mijë eurosh, aq sa ju gjetën të arrestuarit me vete. Mes tyre është rënë dakord që pjesa tjetër e parave do t’i jepeshin në çastin e kalimit të drogës në Itali.

Por, nga ana e tij piloti italian refuzon të flasë. Ai, thonë burimet, ka thënë se ka një shoqëri turistike dhe kishte ardhur në Shqipëri për herë të parë pak ditë më parë vetëm për arsye turistike. Grupi i hetimit thotë se ka dyshime të forta se sapo ka parë avionin të dëmtuar në tokë është përpjekur të largohet nga vendngjarja së bashku me ngarkesën e drogës, por një defekt në automjet, e konkretisht në freksion, e ka tradhtuar atë duke e lënë të bllokuar në mes të rrugës. Bajramaj në këtë moment ka kërkuar ndihmën e një karroatreci për tu transportuar, por në kthim një postbllok i sapongritur, thonë burimet, ka kërkuar kontrollin e mjetit në karroatrec, çka ka sjellë edhe zbulimin e drogës.

Por, Prokuroria dhe sektori i antitrafikut në Policinë e Shtetit po punon për të sqaruar dy ngarkesa të tjera të gjetura në tokë: njëra prej tyre gati 200 metra larg avionit dhe tjetra në pyll. Për këtë, thanë burimet, dyshohet se në këtë histori janë të implikuar edhe dy persona të tjerë duke qenë se në bazë të dëshmive nga vendngjarja janë parë dy automjete civile të largohen, megjithatë gjithçka mbetet për tu zbardhur përfundimisht në ditët në vijim.

Top Channel