Këshilltarja amerikane për Sigurinë Kombëtare, Susan Rice, do të udhëtojë drejt Izraelit, të mërkurën dhe të enjten, për takime të paralajmëruara me homologët izraelitë, bëri të ditur Shtëpia e Bardhë, të martën.
Vizita e Rice, e para në rolin e saj si këshilltare për Sigurinë Kombëtare, vjen pas ngecjes së bisedimeve të paqes mes izraelitëve dhe palestinezëve. Administrata e Obamës e ka bërë të qartë se bisedimet për procesin e paqes në Lindjen e Mesme nuk janë në krye të axhendës gjatë udhëtimit të saj.
Rice kryeson një delegacion amerikan të përbërë nga krerët e disa agjencive, drejt një Grupi Konsultativ amerikano-izraelit, që do të mbledhë vazhdimisht figurat më të larta të qeverive të të dy vendeve, për të diskutuar mbi problemet e sigurisë bilaterale dhe rajonale, njoftoi Shtëpia e Bardhë.
Delegacioni amerikan përfshin edhe përfaqësues nga Departamenti i Shtetit, nga ai i Mbrojtjes, ai i Thesarit dhe komuniteti i inteligjencës, shtoi Shtëpia e Bardhë.
Rice pritet të takohet veçmas me presidentin izraelit, Shimon Peres, dhe kryeministrin Benjamin Netanyahu, deklaroi ajo.
Izraeli anuloi pjesëmarrjen në negociatat e ndërmjetësuara prej SHBA-ve me palestinezët, pasi presidenti Mahmoud Abbas njoftoi papritur arritjen e një pakti uniteti me grupin rival islamik të Hamasit, të cilin Izraeli dhe SHBA-të e konsiderojnë një organizatë terroriste.
Izraeli transferon fondet palestineze, veniten kërcënimet për sanksione
Punonjësit palestinezë të sektorit publik kanë marrë pagat e tyre gjatë së martës, bënë të ditur zyrtarë palestinezë, si një shenjë që Izraeli është tërhequr nga kërcënimi për të vendosur sanksione, kur bisedimet për paqe nisën të përkeqësoheshin muajin e kaluar.
Izraeli kishte thënë më 10 Prill se do të ndërpriste fondet, pasi presidenti palestinez Mahmoud Abbas nënshkroi një seri konventash ndërkombëtare për të drejtat e njeriut, me të cilat ai shpreson që do t’i lejohet palestinezëve të sfidojnë Izraelin në Kombet e Bashkuara, organizatë që e njeh Palestinën si një shtet jo-anëtar që prej 2012-s.
Negociatat për paqen mes Izraelit dhe Palestinës, të ndërmjetësuara nga SHBA-të, përfunduan më 29 Prill pa ndonjë rezultat.
Top Channel
