Të sëmurët mendorë në burgje

Ai u arrestua për plagosje me thikë dhe një raport mjekësor e konsideroi atë të sëmurë mendor dhe për pasojë nuk u deklarua ligjërisht fajtor. Por për shkak të rrezikshmërisë, prej dhjetë vjetësh ai mbahet në burg.

Gjendja e tij verifikohet rregullisht edhe në gjykatë. 59-vjeçari, që vuan nga çrregullimet mendore, është i paaftë të kuptojë edhe apelin që gjyqtari bën për proçedurë.

“Ti e di që unë nuk kam nënë e babë, përse e bën këtë pyetje? Unë jam i zoti i vetes”, i tha ai gjyqtarit në një seancë gjyqësore. “Ju kërkoj ndjesë”, ia ktheu me qetësi kreu i trupit gjykues.

Problemi i të sëmurëve mendorë që janë autorë të veprave penale ka vite që nuk po gjen zgjidhje, aktualisht Drejtoria e Përgjithshme e Burgjeve raporton se mbahen në burgun e Zaharisë në Krujë dhe në spitalin e burgut plot 117 persona në gjendje të tillë.

Nga ana e saj gjykata jep mjekim të detyrueshëm, masë e cila sipas ligjeve duhet të zbatohet në një institucion të posaçëm psikiatrik, i cili ende nuk është ndërtuar.

Ndërsa Avokati i Popullit së bashku me Komitetin Shqiptar të Helsinkit kanë denoncuar se gjendja e këtyre personave me çrregullime mendore rëndohet përsa kohë ata qëndrojnë gati gati si të dënuar.

Pak ditë më parë Ministria e Mbrojtjes i dhuroi Ministrisë së Shëndetësisë mjediset e një reparti ushtark për ta shndërruar në një spital psikiatrik për këtë kategori personash.

Top Channel