RENEA rrethon fshatin Shëndelli

Drejtoria e forcave lëvizëse dha urdhër për rrethimin e fshatit nga forcat speciale, si dhe forca të tjera të ndërhyrjes së shpejtë, pasi mbi policinë u qëllua në tre drejtime të ndryshme ndërsa po kryente një aksion në një banesë të këtij fshati, për kapjen e shtetasit Taulant Gjini, i shpallur në kërkim për tentativë vrasjeje.

Ngjarja ndodhi rreth orës 22 e 30 minuta të së mërkurës, kur policia e Sarandës u gjend nën breshëri armësh. Mjeti i me të cilin po lëviznin katër punonjës të policisë, të përfshirë në operacion, mori disa plumba por për fat të mirë asnjë prej agjentëve nuk u lëndua.

Shërbimet policore kërkuan ndihmën e Drejtorisë së Vlorës, e cila nisi Forcat e Ndërhyrjes së Shpejtë drejt Shëndellisë. Më pas forcave policore iu shtua edhe RENEA e nisur nga Tirana me urgjencë për të gjetur autorët e këtij sulmi.

Forca të shumta policore kanë shoqëruar në komisariatet e Sarandes dhe Vlorës më shumë se 30 banorë të këtij fshati, si persona në dijeni për ngjarjen dhe nën dyshimin se nga banesat e tyre u qëllua ndaj policisë.

Nga marrja e tyre në pyetje dyshohet se autorët e sulmit mund të jenë tre persona, përfshirë këtu të kërkuarin Taulant Gjini, i dyshuar edhe is trafikant i lëndëve narkotike. Policia arriti të gjejë edhe armët e përdorura dhe i ka dërguar ato në laborator për gjetjen e gjurmëve të gishtërinjve.

Gjatë gjithë natës së të mërkurës deri në mesditën e së enjtes, RENEA ka vazhduar të kontrollojë fshatrat në kufi me Shëndellinë për gjetjen e autorëve.

Drejtoria e Përgjithshme e Policisë deklaroi se, nuk do të tolerohet asnjë rast i sulmeve ndaj policisë dhe nuk do të largojë forcat e saj speciale nga Saranda deri në gjetjen dhe vënien përpara drejtësisë të autorëve të sulmit.

Top Channel