Studimi, qumështi i gjirit është më i miri

Mungesa e informacionit, bombardimi me reklama të kompanive që tregtojnë zëvendësues të qumështit të gjirit, apo modeleve të bukurisë të ofruara nga bota e spektaklit, kequdhëheqin nënat e reja drejt përdorimit të qumështit artificial.

Studimi më i fundit, i realizuar nga bashkëpunimi i Qendrës për Fëmijëri të Shëndetshme, zyrës së UNICEF-it në Tiranë dhe Ministrisë së Shëndetësisë, tregoi se 27% e nënave të intervistuara në rrethet kryesore të Shqipërisë i ushqejnë të vegjlit me gji dhe me qumësht artificial dhe 13% e tyre vetëm me qumësht në kuti.
Studimi zbuloi se rekomandimin për t’iu drejtuar qumështit artificial nënat e kanë marrë nga mjekët, më pas nga farmacisti dhe më pas nga shoqet.

Ndërkohë që rekomandimet e Organizatës Botërore të Shëndetësisë sugjerojnë që në 6 muajt e parë të jetës fëmijët duhen ushqyer ekskluzivisht me gji dhe pastaj me fillimin e ushqimeve shtesë, të vazhdojë të paktën deri në vitin e dytë të jetës.

Të dhënat e UNICEF-it të vitit 2010 tregojnë se rreth 18% e vdekjeve tek fëmijët nën 5 vjeç në Shqipëri i atribuohen mungesës së ushqyerjes me gji. Ndërkohë që nxitja e ushqyerjes vetëm me gji ka potencialin të parandalojë 13% të këtyre vdekjeve dhe është pjesë e ndërhyrjes së vetme më të rëndësishme parandaluese përkundrejt vdekshmërisë foshnjore.

Përveç përfitimeve shëndetësore, mungesa e ushqyerjes me gji shkakton dhe humbje ekonomike. Rreth 4.8 milionë dollarë në vit në vendin tonë shpenzohen për të trajtuar sëmundjet dhe gjendjet e parandalueshme nga ushqyerja me gji.  

Studimi u krye në Tiranë, Durrës, Shkodër, Korçë, Elbasan, Fier, Vlorë dhe Kukës.

Top Channel