Strategjia e re për Sigurinë Kombëtare

Në tryezën e Presidentit qëndronin Kryeministri Edi Rama në krah të Ministrave Bushati e Tahiri, përballë tij Kryetari i Kuvendit, Ilir Meta dhe binte në sy se në krah të kryeparlamentarit, ndonëse nuk është anëtar, por ishte ftuar, Presidenca kishte vendosur liderin e opozitës, Lulzim Basha.

E menjëherë pas tij vinin ministra të kabinetit qeveritar, kreu i Shërbimit Informativ Shtetëror, Shefi i Shtabit të Përgjithshëm të Ushtrisë, kreret e Komisioneve të Sigurisë e Integrimit.

Të gjithë këta u ulën në tryezen e Presidentit të Republikës, që shënon edhe fillimin e punës së institucioneve të vendit për një strategji të re të sigurisë kombëtare.

E kërkuar nga qeveria Rama sapo mori detyrën dhe për të cilën në 2 dhjetor të vitit të shkuar me urdhër të Kryeministrit u ngrit grupi i punës,  strategjia e sigurisë kombëtare, do të përfshijë:

“Mirëfunksionimi i Forcave të Armatosura, ruajtja e rendit, Shërbimi Informativ, masat për ruajtjen nga terrorizmi, lufta kundër trafiqeve të paligjshme dhe krimit të organizuar, ruajtja e kufijve të vendit, paprekshmëria tokësore dhe detare, kujdesi për ekonominë në tërësi si dhe kujdesi për ruajtjen e burimeve energjitike, bizneseve strategjike, monedhën, shëndetin e shtetasve etj”, deklaroi Presidenti i Republikës, Bujar Nishani.

Duke kërkuar bashkëpunim dhe përafrim këndvështrimesh mes aktorëve dhe faktorëve që do të marrin pjesë në hartimin e legjislacionit, Presidenti gjeti rastin të sqarojë prezencën e kreut të opozitës, një ftesë e shoqëruar me polemika mediatike.

“Për ta bërë sa më të plotë dhe gjithëpërfshirës bashkëpunimin në çështjet e sigurisë kombëtare, në këtë mbledhje të sotme, që nuk ka lidhje me ndonjë rrezik akut, por me procesin e hartimit të një dokumenti që do të shtrijë efektet e tij për dekada të ardhshme, te një dokument që do të orientojë reformat më të rëndësishme të këtij vendi, në funksion të zgjerimit të audiencës tradicionale kam ftuar kryetarin e opozitës, zoti Lulzim Basha. E falenderoj me këtë rast Bashën dhe i them se e mirëpres kontributin e tij në çështjet e sigurisë kombëtare”, tha Nishani.

Në pjesën me dyer të mbyllura të Këshillit të Sigurisë kanë referuar dy ministra të kabinetit qeveritar. Ministri i Jashtëm, Ditmir Bushati, dikasteri i të cilit drejton procesin e hartimit të strategjisë së sigurisë kombëtare, është fokusuar tek metodologjia që do të ndiqet, afatet dhe detyrat konkrete të cdo institucioni.

Ministrja e Mbrojtjes, Mimi Kodheli mësohet se ka referuar mbi zhvillimin  e reformës së ristrukturimit të forcave të armatosura. Në pjesën e lirë të diskutimit Top Channel ka mësuar se ka qenë kryetari i opozitës Lulzim Basha ai që ka marrë fjalën duke përshëndetur dhe mbështetur hartimin e strategjisë së re të sigurisë kombëtare.
 
Dokumenti i fundit nuk përfshin ndryshimet gjeo-politike

Këshilli i Sigurisë Kombëtare është mbledhur për herë të fundit pas shpërthimit tragjik të Gërdecit nga Presidenti i Republikës, Bamir Topi. Pas kësaj, ish-kreu i shtetit, që u përball me një marrëdhënie të vështirë me qeverinë Berisha, nuk arriti dot të mblidhte më këtë strukturë.

Bamir Topi nuk arriti të mblidhte Këshillin as pas ngjarjes së rëndë të 21 Janarit, ndërsa dështoi gjithashtu një përpjekje tjetër e tij në kohën e përmbytjeve në Veri të vendit, kur drejtuesit e qeverisë dhe institucioneve në varësi të saj nuk e konsideronin në lartësinë e një mbledhjeje të Këshillit të Sigurisë.

Kjo shpjegon edhe përse vendi mbeti me një dokument të strategjisë kombëtare të sigurisë që daton në 2004.
Paradoksalisht dokumenti në fuqi përmban ende si objektiv kombëtar anëtarësimin e vendit në NATO, edhe pse Shqipëria është anëtare e Aleancës prej 5 vjetesh.

Me ndryshimin e qeverisë dhe kërkesës së kësaj të fundit për rishikim të strategjisë së sigurisë, institucionet do të nisin hartimin e dokumentit, për të reflektuar realitetet e reja në vend dhe jashtë tij,  anëtarësimin në NATO, integrimi në BE, por edhe cështje të ekonomisë kombëtare, të korrupsionit e trafiqeve, apo sundimit të ligjit,  sikundër edhe zhvillimet  e reja në rajon si pavaresia e Kosovës, ndryshimet rrënjësore në Ballkanin Perëndimor, Europë dhe më gjerë, që nuk reflektoheshin në dokumentin e konsideruar të vjetëruar  dhe për të cilin shumë herë ekspertë të sigurisë kishin ngritur domosdoshmërinë e hartimit të strategjisë së re.

Hartimi i një dokumenti të ri të sigurisë kombëtare, ishte kërkuar edhe prej Aleancës së Atlantikut të Veriut.

Strategjia e re Sigurisë pritet të përfundojë në fund të muajit maj. Ajo do të konsultohet nga ekspertë të fushës dhe shoqërisë civile. Projekt-dokumenti do t’i paraqitet Këshillit të Ministrave, Kuvendit dhe Këshillit të Sigurisë Kombëtare dhe miratimi pritet të bëhet jo më vonë se korriku i 2014-ës.

Ky afat i paraprin samitit të NATO-s në Britani në shtator të këtij viti, ku vendi ynë do të mund të paraqesë një dokument të ri, që tregon panoramën e sigurisë së brendshme për t’iu përgjigjur detyrimeve të anëtarësimit tonë në NATO.

Kodheli: Strategjia afatgjatë për ushtrinë
Ministrja e Mbrojtjes komenton takimin e Këshillit të Sigurisë Kombëtare

Në ditën në të cilën Këshilli i Sigurisë Kombëtare zhvilloi një mbledhje vendimtare për të ardhmen e fateve të forcave tona të armatosura, ministrja e Brendshme, Mimi Kodheli, foli në studion qëndrore të lajmeve në “Top-Channel” për të gjithë temat më të nxehta të ditës.

Ilir Paço, “Top-Channel” – Zonja Kodheli, një koment i juaji si ministre e Mbrojtjes në lidhje me strategjinë dhe në lidhje me mbledhjen e Këshillit të Sigurisë?

Mimi Kodheli, ministre e Mbrojtjes – Më lejoni t’iu them fillimisht se mbledhja është një organ këshillimor pranë presidentit, ndërsa në programin qeverisës, në 300 ditët e para është mirëpërcaktuar afati i bërjes së të gjithë dokumentarve strategjikë, nga stragegjia kombëtare, strategjia ushtarake dhe plani i zhvillimit afatgjatë të forcave të armatosura të gjitha brenda vitit. Ka qenë i rëndësishëm të shtynim përpara këtë proces të vjetëruar tashmë, pasi kishte 10 vjet që Ministria e Brendshme funksiononte me një strategji të vjetër dhe ku nuk ishin reflektuar ngjarje të rëndësishme në jetën politike, si anëtësimi i vitit 2009 në NATO.

Ilir Paço – Shihet dhe flitet për përplasje mes presidentit dhe qeverise së re në shumë fusha. A mund të thuhet e njëjta sa i përket bashkëpunimit tuaj si ministre e Mbrojtjes?

Mimi Kodheli – Mua më vjen mirë që në atë tryezë, sot u kërkua bashkëpunim dhe bashkërendim, por jo ata që e kërkuan të parët janë domosdoshmërisht ata që e kanë zbatuar këtë. Fakt është që ky këshill është mbledhur vetëm 3 herë në 10 vjet, e kjo tregon për mungesë bashkëpunimi të institucioneve kur forca tjetër politike ishte në qeveri. Kjo nuk e ka kufizuar këndvështrimin tonë ndaj presidentit dhe institucioneve të tjera që duhet të jenë bashkëpunuese e mbështetësve ndaj asaj që qeveria ka ndërmend të bëjë. Fakti është që ne kemi çuar në Presidencë strukturën dhe vendosjen e forcave të armatosura e prej një muaj s’kemi marrë përgjigje, çka na bën të besojmë që kjo është një procedurë që kërkon të pengohet nga ana e institucionit të presidentit, që në rastin më të mirë është vetëm miratues i asaj që Ministria e Brendshme dhe kryeminitri propozojnë në institucion.

Ilir Paço – Si e shpjegoni që prej 5 vitesh, pas anëtarësimit në NATO, ne nuk kemi patur një strategji të re dhe as mbledhje të Këshillit të Sigurimit?

Mimi Kodheli – Kjo është një pyetje që duhet t’u bëhet personave dhe institucioneve të mëparshme, qoftë qeverisjes së mëparshme, qoftë presidentit të mëparshëm. E rëndësishme sot është të ndajmë dy gjëra, qeveria është shumë e fokusuar të çojë deri në fund këtë proces, pasi jemi në një vit vendimtar të NATO-s që në Shtator do të mbajë një ndër samitet më të rëndësishme për të ardhmen, jo vetëm të NATO-s, por të gjithë proceseve gjeopolitike, por edhe atë që ne duhet të bëjmë me forcat e armatosura nesër. Ne duhet të kemi një forcë më të strukturuar, më të vogël e profesionale, më e mirëpajisur dhe e gatshme t’i përgjigjet detyrave kushtetuese e ligjore, si mbrojtja e integritetit, mbrojtja e sigurisë në rajon e pjeëmarrja në operacionet e NATO-s ku ne na kërkohet dhe ku jo domosdoshmërisht kemi dhënë kontributin e duhur në vitet e shkuara.

Top Channel