Denoncohen ish-drejtorët e burgjeve

Në këtë mënyrë Ministrtia e Drejtësisë i kërkon organit të akuzës të hetojë mbi abuzimet që Drejtoria e Shërbimit të Kontrollit të Brendshëm pretendon se ka zbuluar përgjatë verifikimit të praktikave se si janë dhënë lejet për 800 të dënuar në Burgun e Kosovës, Peqinit, Rrogozhinës, Fushë-Krujës, Korçës dhe Durrësit.

Në vijim të këtij qendrimi i janë dorëzuar prokurorisë për t’u hetuar  ish-drejtori Burgut të Kosovës, Shkëlqim Krasniqi dhe ish-përgjegjësi i sektorit ligjor, Eris Bregasi, së bashku me ish-përgjegjësin e sektorit të shëndetësisë së këtij burgu, Ardian Gjini.

Për Burgun e Rrogozhinës janë kallëzuar ish-drejtori Rezart Tusha dhe mjeku Alban Haxhi, për Peqinin ish-drejtori Saimir Hasalla, për Fushë-Krujën, ish-drejtori Grigor Prifti dhe ish-përgjegjësi i sektorit ligjor, Saimir Leka, për Korçën ish-drejtori Koço Bello dhe për Institucionin e Ekzekutimit tw Vendimit Penal në Durrës, ish-drejtori Denion Shëngjergji dhe ish-përgjegjësi i sektorit ligjor Dorian Oketa.

Zyra e shtypit e Ministrisë së Drejtësisë thotë më tej se nga analizimi i dosjeve u konstatua se për muajt korrik, gusht dhe shtator 2013 janë dhënë nga këto drejtori 404 leje të vecanta për të dënuarit prej të cilave 97 prej tyre janë në kundërshtim me ligjin, ndërkohë që 800 të tjera konstatohen të dhëna si leje shpërblyese sërish në kundërshtim me ligjin.

Në Burgun e Kosovës në Lushnje janë gjetur 55 leje të vecanta për të cilat të dënuarit kanë lënë përkohësisht qelitë me justifikimin se kishin familjarë të sëmurë, në një kohë raportet për ta rezultojnë të lëshuara nga i njëjti mjek në Fier i shërbimit të ORL (otorinolaringolog).

Në Peqin janë lëshuar 41 leje për të cilat ka mospërputhje firmash  mes afatit të lejes së sektorit të sigurisë, kujdesit social dhe urdhërit të lëshuar nga drejtori i këtij institucioni.

Në Burgun e Rrogozhinës konstatohen të tilla 40 leje për të cilat nuk ekziston se cfarë praktike është ndjekur apo në disa raste ndryshojne datat sipas të cilave nga njëra anë i dënuari ka fituar lejen për shkak të familjarit të sëmurë, por nga ana tjetër i afërmi i tij kishte kohë që e kishte lënë spitalin, thotë ministria.

Në raportin e  dorëzuar prokurorisë theksohet se të gjithë personat që kishin përfituar leje të tilla janë të dënuar me rrezikshmëri të lartë shoqërore, e në të gjitha rastet ata janë të dënuar për veprën penale të vrasjes.

Në njoftimin e saj Ministria shton se për cdo leje të dhënë nga burgjet është vendosur që të vihet në dijeni edhe Policia e Shtetit, ndoshta si një masë e domosdoshme për të parandaluar raste si ai i janarit të këtij viti, kur i dënuari Astrit Gjepali u vra rrugës duke u kthyer në burg .

Top Channel