Shpërthimet nuk kanë të sosur

Automjeti tip Fiat, me targa AA 052 FD, që ishte parkuar para një pallati, në lagjen “Punëtori” të qytetit të Fushë-Krujës, ka shpërthyer mbrëmjen e së premtes, pa shkaktuar dëme në njerëz.

Nga shpërthimi, bëhet e ditur se është dëmtuar edhe një automjet tjetër, që ndodhej i parkuar pranë tij, si dhe xhamat e apartamenteve të katit të parë të pallatit.

Nga veprimet e para hetimore rezulton se automjeti i përket shtetases Mimoza Isufi, 42 vjeçe, e cila e kishte parkuar para pallatit ku banon.

Grupi hetimor dhe strukturat lokale të policisë kanë nisur hetimet, në funksion të zbardhjes së shkakut të shpërthimit dhe rrethanave.

Hetimet e para janë përqendruar në zbardhjen e konflikteve personale, në të cilat mund të jetë përfshirë pronarja e automjetit, një grua e ve me dy fëmijë.

Ndërkohë që, rreth orës 22 të mbrëmjes, një tjetër automjet shpërtheu në lagjen “Partizani” në Burrel. Mjeti që shpërtheu është në pronësi të një punonjësi të SHISH. Në momentin e shpërthimit, mjeti ka qenë i parkuar në rrugë. Për fat të mirë nuk ka pasur dëmtime në njerëz.

Gjatë kësaj jave, në qarkun e Durrësit janë regjistruar edhe dy shpërthime të tjera. Njëri prej të cilëve në automjetin e një punonjësi policie të burgut të Fushë-Krujës, shpërthim për të cilin pati dhe një të arrestuar, si dhe një shpërthim në portën e jashtme të një familjeje në fshatin Hardhishtë të Shijakut.

Përdorimi i tritolit duket se po kthehet në stilin e preferuar të eleminimit apo frikësimit të rivalëve në botën shqiptare të krimit.

Vetëm dy ditë më parë, automjeti i një punonjësi policie të Institucionit të Ekzekutimit të Veprave Penale po në Fushë Krujë u dëmtua me eksploziv në orët e para të së mërkurës.

Të njëjtën ditë u verifikua edhe një tjetër atentat në Tiranë, nga i cili u plagos një biznesmen ndërtimesh dhe dy bashkëpunëtorë të tij. Dy prej të plagosurve humbën këmbët si pasojë e shpërthimit.

Ndërsa të enjten një atentat u krye ndaj një biznesmeni të pjesëve të këmbimit të automjeteve në Vorë, i cili në skedarët e policisë rezulton me një të kaluar kriminale, duke shtyrë hetuesit të mendojnë për një larje hesapesh.

Top Channel