Protesta e studentëve kosovarë

Këto pamje do t’ia linin vendin, pak orë më vonë, atyre ku protestuesit u jepnin lule anëtarëve të njësisë speciale, si simbol i synimeve paqësore të protestës.

Marshit protestues të studentëve nga konviktet iu bashkuan qindra protestues nga shoqëria civile, punëtorë të ndërmarrjes “Sharri”, organizatat “Kipred”, “Cohu”, profesorë e ish-profesorë të UP-së, duke çuar numrin e protestuesve në rreth 800.

Në përkrahje të studentëve ishte edhe Organizata Politike nga Tirana.

Në lidhje me situatën e krijuar në UP, për herë të parë, ka reaguar edhe kryeministri i vendit, Hashim Thaçi. Përmes një postimi në Facebook, Thaçi thotë të ketë takuar ministrin e Arsimit, Ramë Buja, dhe se ka kërkuar raportimin e tij në lidhje me UP-në.

“Duke respektuar autonominë e Universitetit të Prishtinës, u bëj thirrje organeve përkatëse të universitetit, që të dëshmojnë nivel të lartë përgjegjësie dhe, në bazë të statutit të Universitetit të Prishtinës, si dhe legjislacionit në fuqi për arsimin e lartë, të angazhohen për ta zgjidhur këtë situatë”, shkruan Thaçi.

Në anën tjetër, ministri i Arsimit, Shkencës dhe Teknologjisë, gjatë raportimit në Komisionin për Arsim, Kulturë, Rini dhe Sport, tha se tashmë është krijuar komisioni vlerësues dhe ka kërkuar që t’iu lihet hapësirë mekanizmave përkatës të veprojnë lidhur me këto probleme.

“Unë do të kisha propozuar, që t’iu lihet kohë e hapësirë këtyre mekanizmave të krijuar për të bërë punën e tyre dhe të vlerësojnë, e pastaj të mos amnistohet askush për veprimet e bëra dhe të angazhohen maksimalisht të tri pushtetet, sepse kjo nuk është çështje që i përket vetëm një mekanizmi, vetëm Ministrisë së Arsimit, për faktin që jemi një produkt i këtij universiteti të gjithë bashkë dhe do të duhej angazhim i përbashkët”, tha Ramë Buja, ministër i Arsimit, Shkencës dhe Teknologjisë.

Përderisa protestuesit qëndronin në oborrin e rektoratit, Labinot Hajdari, nga zyra për informim e këtij institucioni, përmes telefonit tha se gjithë stafi menaxhues, duke përfshirë edhe rektorin Ibrahim Gashi, dhe prorektorët kanë qenë brenda objektit, duke vazhduar normalisht punën.

Në orën 16:00 protestuesit u shpërndanë të qetë, duke deklaruar se do ta vazhdojnë protestën deri në dorëheqjen e rektorit Ibrahim Gashi.

Prishtinë, studentët hyjnë në Rektorat

Studentët kanë hyrë me forcë paraditen e së hënës në oborrin e Rektoratit të UP-së në Prishtinë. Të paktën 7 persona janë lënduar duke u shtyrë me policinë që ruante objektin. Ndërkohë që në zonë ndodhen forca të shumta policore dhe njësia speciale.

Në anën tjetër ministri i Arsimit, Shkencës dhe Teknologjisë, gjatë raportimit në Komisionin për Arsim, Kulturë, Rini dhe Sport tha se tashmë është krijuar komisioni vlerësues dhe ka kërkuar që t’iu lihet hapësirë mekanizmave përkatës që të veprojnë lidhur me këto probleme.

Top Channel