Prishtinë, protestat në ditën e katërt

Pas mbledhjes së protestuesve në atë që duket se po kthehet në një ritual e që siç paralajmërohet do të vazhdojë, nuk munguan as aksionet simbolike.

Gjatë ditës protestuesve iu bashkuan edhe 10 studentë kandidatë për bursë në shtetet e Evropës, të cilët erdhën në Rektorat pasi nuk arritën të kryenin proçedurat administrative brenda institucionit.

E për këtë Rektorati përmes një komunikate fajëson protestuesit për atë që e quan pengim të menaxhmentit të UP-së në Rektorat.

Këshilli protestues u takua gjatë ditës edhe me përfaqësues të Parlamentit Studentor të këtij Universiteti, të cilët kërkojnë ndërprerjen e protestave.

Por, mbështetja protestuesve u ka ardhur nderkohë nga larg. Doktorantë, hulumtues dhe staf akademik i universiteteve të ndryshme në BE, SHBA dhe Australi, kanë reaguar për gjendjen në UP me anë të nje deklarate.

“Ne shprehim solidaritetin tonë me studentët dhe pedagogët e  UP-së të cilët në një formë apo tjetër po i kundërvihen haptazi problemeve të mëdha me të cilat ballafaqohet ky institucion, dhe njëkohësisht thërrasim që menjëherë të realizohen kërkesat e tyre për të rishikuar gjendjen në universitet”, thuhet në deklaratë.

Përkrahje për studentët protestues shprehen edhe organizata shqiptare studentore në Gjermani e Austri. Protestuesit paralajmëruan për të hënën marsh nga qendra e studentëve deri te ndërtesa e Rektoratit.

Në anën tjetër nga Grupi i Pavarur i Studentëve është lançuar edhe një peticion online për dorëheqjen e rektorit Ibrahim Gashi.

Top Channel