Lideri i opozitës ukrainase, Arseniy Yatsenyuk deklaroi se protestat do të vazhdojnë, ndërsa refuzoi ofertën e presidentit Yanukovych për të marrë postin e kryeministrit.
Yatsenyuk u shpreh se opozita është e gatshme që të marrë pushtetin, por përpara se kjo të ndodhë duhet të përmbushen një sërë kërkesash, përfshi zgjedhjet e parakohshme.
Ndërkohë, përplasje u regjistruan edhe gjatë natës, me aktivistët që mësynë disa institucione shtetërore.
Propozimi i Yanukovych për t’i ofruar opozitës pozicionin kyç në ekzekutivin e vendit erdhi ndërsa gjatë javës janë shënuar të paktën pesë viktima në përballjet me forcat e rendit.
Oferta e Yanukovych parashikonte gjithashtu që ish-kampionit të botës në boks dhe një prej figurave kryesore të opozitës, Vitalti Klitschkos, t’i ofrohej pozicioni i zëvendëskryeministrit.
Presidenti Viktor Yanukovych kishte premtuar më herët se do të bënte lëshime në përpjekje për të qetësuar situatën në vend, duke bërë apel për ndryshimin e ligjit anti-protestë dhe duke premtuar riformatim të kabinetit.
Por Vitaly Klitschko, një nga liderët e opozitës të ftuar në bisedime, kishte thënë se protestuesit tani kërkonin dorëheqjen e presidentit.
Top Channel
