Kajro tronditet nga shpërthimet

Shpërthimi i parë ndodhi jashtë zyrave qëndrorë të policisë në qendër të Kajros ku katër person gjetën vdekjen dhe 51 të tjerë u plagosën, një pjesë e të cilëve në gjendje të rëndë. Brenda orës kryeqyteti u trondit nga dy shpërthime të tjera, ku mbeti i vdekur një tjetër person dhe mbi 15 u plagosën.

Sulmet mbërrijnë në prag të 3-vjetorit të revoltës së 2011-ës që rrëzoi nga pushteti pas dekadash udhëheqje, ish-presidentin Hosni Mubarak.

Sulmi në afërsi të zyrave të policisë u mor përsipër nga Ansar Beit al-Maqdis, një grup militant i lidhur me Al Kaedan, i njëjti që mori përsipër sulmin me bombë mbi një ndërtesë sigurie në qytetin e Mansuras në veri të vendit, ku mbetën të vrarë të paktën 16 persona dhe 100 të tjerë u plagosën.

Shpërthimi i parë ka ndodhur rreth orës 06:30 me orën lokale dhe menjëherë më pas janë dëgjuar breshëri automatike.

Që prej 2011 Egjipti nuk po gjen paqe. Në korrik të vitit të kaluar, ushtria rrëzoi nga pushteti presidentin e zgjedhur pas revolucionit të 2011-ës, Mohamed Morsi, i cili akuzohet për nxitje të dhunës dhe vrasje, prej të cilave rrezikon edhe dënimin kapital, atë me vdekje.

Në prag të 3-vjetorit të ngritjes krye kundër Mubarakut, “Vëllazëria Myslimane” e shpallur organizatë terroriste nga qeveria e përkohëshme e ushtarakëve, ka paralajmëruar protesta të fuqishme në të gjithë vendin.

Pak ditë më parë, egjiptianët votuan për Kushtetutën e tyre të re, me anë të së cilës ushtria synon të legjitimojë aksionet e saj dhe të rikthejë vendin në normalitet.

Top Channel