Më shumë se gjysmë miliard dollarë në formë kesh, asete apo lëndë narkotike u kapën gjatë një super-operacioni kundër pastrimit të parave në Australi.
Blici me emrin e koduar “Task Force Eligo”, shkatërroi 18 grupe kriminale dhe çoi në arrestimin e qindra personave të përfshirë në afera të paligjshme. Suksesi i tij i detyrohet edhe bashkëpunimit të zyrtarëve vendas me agjencitë ndërkombëtare të zbatimit të ligjit.
“Ky është një shembull i mirë i goditjes që mund t’i jepet krimit të organizuar në Australi. Çdo formë e tij në fund çon tek paratë, pavarësisht nga lloji i krimit që kryhet”, deklaroi Michael Keenan, minister i Drejtësisë.
Nga 580 milionë dollarët australianë (512 milionë USD) të përfunduar në duart e policisë, 23 milionë ishin kesh. Të gjitha këto para, siç sqarojnë zyrtarët e fushës, kanë qenë të destinuara për aktivitete kriminale si trafiku i drogës.
Qendra australiane e Analizës dhe Raportimit të Transaksioneve tërhoqi vëmendjen tek kërcënimi global që paraqet sipas saj, pastrimi i parave.
“Kriminelët nuk njohin kufij. E vetmja përgjigje që mund t’i japim pastrimit të parave është bashkëpunimi, si në nivel kombëtar, ashtu edhe me kolegët përtej detit, sepse paratë e krimit do të vërshojnë dhe detyra jonë është t’i vëmë fre”, deklaroi John Schmidt, drejtor i AUSTRAC.
Në mesin e të arrestuarve ishte edhe një shtetas amerikan 58 vjeç, i cili nuk ishte në gjendje të sqaronte origjinën e 5 milionë dollarëve të vendosur në 7 valixhe që u gjendën fundjavën e kaluar në një apartament të Sidneit, ku ai po qëndronte.
Zyrtarët vendas thonë se ashpërsimi i kontrolleve ua ka vështirësuar grupeve të krimit transferimin e parave në mënyrë elektronike, duke i shtyrë t’i mbajnë paratë kesh.
Top Channel
