Pastrim parash në Bankën e Vatikanit

Imzot Nunzio Scarano, që ndodhet në arrest shtëpiak për një tjetër akuzë, dyshohet se nëpërmjet rolit të tij në Bankën e Vatikanit ka pastruar paratë e pista në shifra që shkojnë deri në 20 milion euro.

Mes të ndaluarve është edhe një ish-llogaritar i Selisë së Shenjtë dhe dy persona të tjerë që kanë patur dijeni për skemën e pastrimit të parave, njoftoi policia italiane.

Vitin e kaluar, Papa Françesku ngriti një komision të posaçëm brenda Selisë së Shenjtë me objektiv hetimin e aktiviteteve të Bankës së Vatikanit, e vendosur shpesh në qendër të skandaleve.

Historikisht Vatikani ka kundërshtuar të drejtën e policisë italiane për të hetuar klerikët apo pjesëtarët e tjerë të administratës së tij duke u mbrojtur me privilegjet që u njeh imuniteti diplomatik.

Por që prej ardhjes në krye të Selisë së Shenjtë të Papa Françeskut ka nisur një bashkëpunim me autoritetet italiane që çoi në arrestimin e Imzot Scarano-s verën e vitit të kaluar.

Të martën policia bllokoi 6.5 milion euro në llogarinë bankare të Scarano-s si dhe disa pasuri të patundëshme të tij, përfshirë këtu edhe një apartament superluksoz në jug të Salernos.

Banka e Vatikanit, njohur zyrtarisht si Instituti për Punët e Fesë, është njëri prej institucioneve financiare me fshehtësinë më të madhe në botë. Ka vetëm 114 punonjës që menaxhojnë asete që kapin vlerën e 5.4 miliard eurove.

Top Channel