Hollande viziton Zonjën e Parë në spital

Vizita e së premtes është e para që kur u publikuan në shtyp imazhet e tradhëtisë së tij të supozuar me aktoren Julie Gayet.

Trierweiler u shtrua në spital, në dukje si rrjedhojë e traumës së pësuar nga mësimi i historisë nëpërmjet faqeve të revistës që publikoi edhe një seri fotosh inkriminuese.

Përveç fotove, revista “Closer” raportonte se marrëdhënia e fshehtë e Hollande me Gayet kishte rreth dy vjet që kishte nisur, që gjatë fushatës zgjedhore të 2012-s.

Ditën e enjte, Gayet vendosi që të padiste revistën për shkelje të të drejtës së saj të jetës private, duke kërkuar një dëmshpërblim prej 50 mijë eurosh dhe 4 mijë euro shtesë për të mbuluar kostot gjyqësore.

Nëse Gayet do të fitojë çështjen, revista do të jetë e detyruar të publikojë vendimin gjyqësor në koopertinën e saj.

Presidenti Hollande, i cili tregoi një indiferencë të theksuar ndaj shëndetit të partneres në ditët e para pas publikimit të historisë, nuk ka komentuar mbi skandalin mediatik të përqendruar rreth tij, duke pretenduar se jeta private duhet të mbetet e tillë edhe për një kryetar shteti.

Ai gjithashtu kishte kërcënuar me paditjen e revistës, por duket se ndikimi i këshilltarëve të tij e bindi që të tërhiqej nga kjo nismë.

Hollande është baba i katër fëmijëve, nga partnerja e tij e mëparshme dhe kandidatja humbëse për Presidente e Francës përballë Sarkozy në fushatën e 2007-s, Segolene Royal.

Top Channel