Bota

Superstuhia europiane, të paktën 13 viktima

29/10/2013 02:50

Një stuhi e fuqishme që ka përfshirë veri-perëndimin e Europës ka lënë të paktën 13 viktima, 6 prej të cilëve në Gjermani.

Dy persona humbën jetën kur makina e tyre u përplas me një pemë të rrëzuar në Gelsenkirchen, në Gjermaninë perëndimore. Dy fëmijë ishin në të, duke mbetur të plagosur.

Në Brittany, në perëndim të Francës, një grua u rrëmbye nga dallgët e detit, ndërkohë që në Amsterdam të Holandës një pemë e rrëzuar nga era bëri që një grua të përfundonte në një kanal.

Erërat me shpejtësi rekord prej 191 km/h kanë pushtuar gjithë Detin e Veriut, teksa shumë trena kanë anuluar udhëtimet e tyre brenda dhe përqark Londrës, si dhe në veri-perëndim të Gjermanisë.

Të paktën 50 fluturime janë anuluar në aeroportin “Schiphol” të Holandës, ndërkohë që media gjermane ka raportuar për disa vonesa në aeroportet e Hamburgut dhe Dyseldorfit.

Në Gjermani, një peshkatar dhe një marinar mbetën të vdekur, në dy aksidente të ndryshme në det. Duke përfshirë incidentin në Gelsenkirchen, 4 persona janë vrarë në Gjermaninë veri-perëndimore, gjatë rënies së pemëve mbi automjete, raporton Agjencia Mediatike Gjermane (DPA).

Ndërprerja e energjisë elektrike ka goditur mbi 42 mijë shtëpi në veri të Francës, ndërkohë që në Belle-Ile (Brittany), një grua ra në det nga një shkëmb. Stuhia kaloi përmes Brittany dhe Normandisë mëngjesin e së hënës, duke shkaktuar rrëzimin e pemëve dhe mungesë të energjisë elektrike në shumë zona.

Në Britaninë e Madhe, të paktën 600 mijë shtëpi kanë mbetur pa drita, edhe pse më vonë ato u rikthyen në disa zona.

Në Kent, në juglindje të Anglisë, një vajzë 17-vjeçare u godit nga një pemë e rënë mbi dhomat e rimorkiueshme, ku familja e saj jetonte për shkak të punimeve për rikonstruksionin e shtëpisë së tyre.