Spanjë, skandali i korrupsionit

Zoti Rajoy ka folur në lidhje me pagesat ilegale nga një fond të drejtuar nga financieri i dikurshëm i Partisë Popullore, Luis Barcenas, që po përballet me akuzën e shmangies së taksave.

Në fjalimin e tij, ai ka deklaruar se kishte qenë i detyruar t’u përgjigjej deklaratave që sipas tij nuk ishin të besueshme, por që kishin filluar të dëmtonin imazhin e Spanjës.

“Kam dalë këtu për t’u bërë rezistencë gënjeshtrave, manipulimeve dhe sajesave të inkurajuara nga liderë të caktuar politikë”, ka deklaruar Rajoy.

Ai ka theksuar se gjendja e ekonomisë së Spanjës është delikate dhe se vazhdimi i fokusimit tek skandali po dëmtonte imazhin e vendit.

Megjithatë, kryeministri ka pranuar se kishte bërë gabim duke i besuar dikujt që nuk e meritonte besimin, duke iu referuar zotit Barcenas.

Si Rajoy ashtu edhe anëtarët e tjerë të Partisë Popullore i mohojnë akuzat se kanë marrë pagesa ilegale. Sido që të jetë, zërat në fjalë shkaktuan irritim tek qytetarët spanjollë, të cilët më herët gjatë muajit mbajtën protesta anti-qeveritare dhe kërkuan dorëheqjen e kryeministrit.

Mesin e muajit të kaluar përleshjet shpërthyen mes protestuesve dhe policisë, pasi mbi 1 mijë persona u mblodhën jashtë selisë së Partisë Popullore, duke kërkuar largimin e qeverisë.

Skandali i korrupsionit u zbulua në janar kur gazeta “El Pais” publikoi dokumente që përmbanin një listë me pagesa ilegale brenda Partisë Popullore.

Top Channel