Egjipt, familja e Morsit akuza ushtrisë

Zoti Morsi mbahet në një lokacion anonim, pa akuza të ngritura ndaj tij, që kur u rrëzua nga pushteti më 3 korrik.

Familja e tij deklaroi se konsideron përgjegjëse ushtrinë për shëndetin dhe sigurinë e ish-kreut të shtetit. Deklarata në fjalë është e para që bëhet nga familja Morsi që kur ai u detyrua të linte zyrën e tij.

“Ne po marrim masa ligjore lokale dhe ndërkombëtare ndaj Abdul Fatah al Sisi, lideri i grushtit të përgjakshëm ushtarak, si dhe ndaj grupit të tij puçist”, deklaroi Shaima Morsi.

Familja i bëri thirrje Gjykatës Ndërkombëtare të Drejtësisë që të hapë një hetim për ngjarjet që çuan në rrëzimin e Morsit në fillim të muajit.

Një nga djemtë e Morsit, Osama, deklaroi: “Ajo që po ndodh është shkelje e të drejtave të njeriut dhe një skandal në kuptimin e plotë të fjalës”.

Osama i cilësoi mënyrat se si ushtria po e trajton të atin si një “rrëmbim”. Familja e ish-presidentit nuk ka pasur kontakt me të që prej rrëzimit të tij.

Top Channel