15 ushtarë egjiptianë kanë mbetur të vdekur dhe 40 të tjerë janë plagosur, pasi autobusi me të cilin udhëtonin është përplasur me një kamion.
Aksidenti ndodhi në autostradën el-Alamein, që lidh Kajron me qytetin port të Mesdheut, Aleksandrinë.
Sipas raportimeve, ata ishin duke udhëtuar për në shtëpi, për t’u bashkuar me familjet e tyre për pushime, gjatë muajit të shenjtë të Ramazanit.
Rreth 12 mijë njerëz vdesin nëpër rrugët e Egjiptit cdo vit, bën të ditur Organizata Botërore e Shëndetësisë. Kushtet e mjerueshme të rrugëve dhe ligjet e dobta të trafikut janë shkak i këtyre aksidenteve.
Në tetor, 21 anëtarë të forcave kombëtare të sigurisë ndërruan jetë pas një aksidenti me automjetin e tyre në gadishullin e Sinait, shumë pranë kufirit me Izraelin.
Ndërsa nëntorin e kaluar, ministri i Transporteve dha dorëheqjen, pasi 50 fëmijë të moshës 4-6 vjeç mbetën të vdekur, pasi autobusi i shkollës së tyre u godit nga një tren, pranë Manfalut, 350 km në jug të Kajros.
Top Channel
