Kuba: Armët e vjetëruara, në Kore për riparim

Pajisjet, të fshehura poshtë pakove të sheqerit për kafe, në varkë, ishin prodhuar në mesin e shekullit 20 dhe përfshinin 2 raketa komplekse anti-ajrore, 9 raketa të shpërbëra në pjesë këmbimi, 2 avionë MiG-21 dhe 15 motorë për këto lloj aeroplanësh, njoftoi ministria në fjalë.

“Marrëveshjet e nënshkruara nga Kuba në këtë fushë ishin mbështetur nga nevoja për të mirëmbajtur kapacitetin mbrojtës në mënyrë që të sigurojë sovranitetin kombëtar”, thuhej në deklaratë. “Republika e Kubës thekson edhe njëherë vendosmërinë e saj dhe angazhimin e palëkundur për paqe, çarmatim, përfshi edhe çarmatimin bërthamor, dhe respektimin e ligjeve ndërkombëtare”.

Njoftimi i qeverisë kubaneze, që u lexua edhe në televizionin shtetëror, është kapitulli i fundit në një dramë ndërkombëtare, që ka të gjitha elementët e një thrilleri: një konfrontim të dhunshëm në një anije të ndaluar koreano-veriore, një raketë e dyshimtë në bord, një atak në zemër dhe një përpjekje për vetëvrasje.

Autoritetet e Panamasë, të martën, kanë qenë duke ekzaminuar pajisjet ushtarake, të zbuluara mbrëmjen e së hënës, gjatë një inspektimi anti-drogë. Për shkak se vazhdon ende me programin e saj bërthamor, Korea e Veriut është pezulluar nga Kombet e Bashkuara nga import-eksporti i armëve luftarake.

Disa detaje të një konfrontimi të mundshëm kanë qenë të disponueshme, por ekuipazhi i anijes nga Korea e Veriut, me 35 anëtarë, kundërshtoi arrestimin, bëri të ditur ministri i Sigurisë së Panamasë, Jose Raul Mulino. Ai e përshkroi atë si “dicka të dhunshme”, duke thënë se ekuipazhi u përpoq të sabotonte anijen, duke prerë kabllot e vinçave, që mund të përdoreshin për të shkarkuar ngarkesat.

Anija e njohur me emrin Cong Con Gang u nis nga brigjet e Rusisë më 12 prill, përshkoi Oqeanin Paqësor dhe më pas hyri në Kanalin e Panamasë, në fillim të qershorit, me Kubën destinacion të fundit.

Zyrtarët panamezë thanë se anija u zhduk nga sistemet satelitore, pasi kaloi anën e Karaibeve, duke u rishfaqur më 11 korrik. Disa ekspertë mendojnë se ekuipazhi, ndoshta qëllimisht, ka fikur sistemin që tregon automatikisht vendndodhjen e anijes.

Ministri panamez i Sigurisë, Hose Raul Mulino, tha se megjithëse armët janë të vjetra, ngarkesa është e paligjshme dhe nuk mund të kalojë territorin panamez, pa njoftuar paraprakisht.

Sipas tij, pritet mbërritja e një komisioni nga Këshilli i Sigurimit të OKB-së, për të ndihmuar në inspektimin e ngarkesës. Korea e Veriut dhe Kuba janë dy shtete komuniste.

Në fund të qershorit, një delegacion i lartë ushtarak nga Penjani mbërriti në Kubë dhe u prit nga presidenti Raul Kastro. Duke iu referuar medias kubaneze, ata diskutuan lidhjet historike, që i bashkojnë dy vendet, si dhe vullnetin e përbashkët për t’i forcuar më tej ato”.

Top Channel