Kinë, 300 mijë të evakuuar nga “Soulik”

Lajmin e bëjnë të ditur mediat shtetërore kineze, sipas të cilave erëra me 119 kilometra në orë vërshuan në brigjet e provincës së Fuzhianit.

Sipas agjencisë “Xinhua”, autoritetet po implementojnë planet e emergjencave, pasi shirat e dendura kanë lënë pas rreth 200 persona të vdekur ose të humbur.

Më herët tajfuni “Soulik” shkaktoi përmbytje të mëdha në ishullin e Tajvanit. Deri tani, një person raportohet të jetë vrarë në ishull, ndërsa mbi 8.500 persona të tjerë janë evakuar nga zona të ndryshme, përfshirë ato malore, nga frika e rrëshqitjeve të tokës.

Në Fuzhian dhe Zhejiang, një tjetër provincë bregdetare kineze, fluturimet dhe udhëtimet hekurudhore u ndërprenë, ndërsa varkat e peshkimit u thirrën të ktheheshin në breg.

Në Tajvan, një oficer policie u vra nga rënia e tullave të një ndërtese, ndërsa persona të tjerë morën plagë të lehta nga i njëjti episod, si dhe nga rrëzimi i pemëve e aksidentet rrugore.

Erërat e fuqishme dhe shirat e dendura kanë shkaktuar ndërprerje të energjisë elektrike, ndërkohë që banorët kanë ezauruar të gjitha furnizimet në supermarkete.

“Soulik” është tajfuni i parë që godet Tajvanin këtë vit dhe frika ka qenë e madhe për shkak se ishulli ishte toka e parë ku dukuria natyrore bëri zbarkimin. Rreth 50 mijë ushtarë janë vendosur në gatishmëri.

Top Channel