Muslimanët në Angli nxituan të distancohen nga episodi i tmerrshëm i masakrimit të një ushtari në rrugët e Londrës, të mërkurën, akt të cilin e dënojnë me forcë.
Ky veprim barbar nuk ka asnjë lloj baze në islam, tha në deklaratën e tij Këshilli Musliman i Britanisë, i cili u bëri thirrje si ndjekësve të kësaj feje, ashtu dhe jo-muslimanëve, të bashkohen në solidaritet për të mos i lënë forcat e urrejtjes të triumfojnë.
Mohamed Ansar, komentator për çështjet sociale e politike, apeloi për vetëpërmbajtje: “Ajo që pamë në rrugët e Londrës ishte e neveritshme, një akt vërtet i urryer kriminaliteti do të thoja, dhe jam i kujdesshëm këtu kur theksoj fjalën “kriminalitet” dhe jo terrorizëm”.
Ai thekson se motivi i asaj çfarë ndodhi në Woolwich nuk është sqaruar ende plotësisht dhe se në këtë situatë, gjërat duhen parë me qetësi, me sens mase dhe perspektive.
Nuk duhet të biem prè e reagimeve të momentit, të cilat do të përshkallëzonin tensionet, – thotë Ansar, – e të përflaknin ankthet e komuniteteve.
Përfaqësues të Komitetit Musliman të Çështjeve Publike, në Britaninë e Madhe, e përshkruan sulmin si shokues, por shtojnë se kur vjen fjala te frenimi i ekstremizmit në vend, kanë pësuar dështime si komuniteti musliman atje, ashtu dhe vetë qeveria britanike.
Të dhënat e censusit në 2011-n tregojnë se muslimanët përbëjnë grupin e dytë më të madh fetar në Angli, me të paktën 2,7 milionë persona, që do të thotë se numri i tyre është rritur me 1,2 milionë, krahasuar me 10 vjet më parë.
Top Channel
