Vritet i njohuri i Tsarnaev

FBI-ja tha fillimisht se ishte një agjent i saj, ai që vrau të riun, mik i vëllezërve Tsarnaev, por në deklaratën pasuese e lë të pasqaruar, se cili ka qenë personi që ka shtënë mbi 27-vjeçarin.

Blloku i apartamenteve, ku ndodhi incidenti me emigrantin çeçen, është izoluar nga policia. Todashev, sipas raporteve në media, kishte jetuar në zonën e Bostonit, para se të transferohej në Florida, disa muaj më parë.

Ai e njihte të dyshuarin për sulmet e maratonës, Tamerlan Tsarnaev, sepse të dy ishin marrë me arte marciale. Zyrtarë të implementimit të ligjit thanë për Associated Press, se Todashev u qëllua pasi sulmoi agjentin e FBI-së me thikë, një përplasje e dhunshme e nisur, siç tregojnë ata, nga i riu çeçen.

Kolegu i tij i dhomës, njëkohësisht mik i Todashev-it, rrëfen se sa i shqetësuar ishte 27-vjeçari, për faktin që do të merrej në pyetje nga Byroja Federale e Hetimit.

Ai nuk kishte asnjë lidhje me ngjarjen e Bostonit, thotë Khusen Tamarov. “Asnjëri prej nesh nuk kishte të bënte fare me atë episod. FBI kishte nisur ta merrte në pyetje Todashev-in, pak pas sulmeve të Bostonit”.

Shoku i tij kujton se si pyetjet u pasuan nga ndjekja dhe mbajtja nën vëzhgim, sapo u mësua se autorët e shpërthimeve ishin çeçenë. Sipas Associated Press, Todashev ishte arrestuar në fillim të muajit për agresion, pas sherrit mbi një vendparkimi në një qendër tregtare të Orlandos, në Florida.

Top Channel