Një grup peshkatarësh kinezë të arrestuar dy javë më parë nga Korea e Veriut janë liruar bashkë me varkën e tyre. Ekuipazhi prej 16 vetësh ishte marrë nën kontrollin e koreano-veriorëve më 5 maj në Detin e Verdhë.
Kina deklaroi të hënën se po negocionte me Penianin për lirimin e tyre që prej datës 10 maj. “Të gjithë ata janë në gjendje të mirë shëndetësore dhe po kthehen”, raporton agjencia e lajmeve “Xinhua”.
Ndërsa pronari i varkës, Yu Xuejun tha për agjencinë e lajmeve “Reuters” se për lirimin nuk është paguar asnjë shpërblim.
Më herët ai kishte thënë se koreano-veriorët kërkonin 100 mijë dollarë shpërblim dhe se ai kishte marrë 8 telefonata ku kërkohej shuma në fjalë.
Vitin e kaluar, në një ngjarje të ngjashme, 29 peshkatarë kinezë dhe tre varka u kapën nga një grup i panjohur koreano-verior.
Ata u liruan pas dy javësh dhe edhe atëherë nuk u sqarua nëse ishte paguar një shpërblim, apo nëse pengmarrësit kishin qenë të marinës koreano-veriore apo grup i pavarur.
Kina është partneri kryesor tregtar i Koresë së Veriut dhe njëkohësisht aleati i saj më i ngushtë, por lidhjet mes tyre janë ftohur në muajt e fundit, sidomos pas testit të tretë bërthamor të Penianit më 12 shkurt.
Pekini mbështeti shtimin e sanksioneve ndaj Veriut në përgjigje ndaj testit në fjalë dhe disa prej bankave kineze kanë ndërprerë që atëherë bashkëpunimin me ato koreane.
Top Channel
