Boston, babai i të dyshuarve drejt SHBA-ve

Anzor Tsarnaev tha për median shtetërore ruse, RIA Novosti, se ai së bashku me gruan e tij, Zubeidat, do të lënë Republikën gjysmë-autonome të Rusisë jugore, Dagestanin, gjatë ditës së enjte.

Autoritete nga agjenci të ndryshme qeveritare në SHBA nuk e kanë konfirmuar menjëherë planin e udhëtimit të prindërve Tsarnaev.

Sipas raportimit zyrtar të medias ruse, një burim policor tha të mërkurën se prindërit e të dyshuarve dhanë pëlqimin për të udhëtuar në SHBA dhe “do të përfshihen në hetimet amerikane”.

Pas publikimit të raportit, aktivisti i të drejtave të njeriut, Kheda Saratova tha për CNN se vetëm babai, Anzor, do të udhëtojë drejt SHBA-ve, mëngjesin e së premtes.

Lajmi për udhëtimin e pashmangshëm vjen 9 ditë, pasi 3 njerëz ndërruan jetë dhe shumë të tjerë u plagosën, kur dy bomba shpërthyen në vijën e finish-it të maratonës.

Tamerlan Tsarnaev, 26 vjeç, ndërroi jetë disa ditë më vonë, pas një shkëmbimi zjarri me policinë. Trupi i tij ende nuk është kërkuar, deri të mërkurën, sipas Terrel Harris, një zëdhënës i shefit të zyrës së ekzaminimeve mjekësore të Massachusetts-it. Shkaku ekzakt i vdekjes së tij ende nuk është përcaktuar.

Vëllai i tij, Dzhokhar, u kap i gjallë natën e së njëjtës ditë, pasi u gjet i fshehur në një varkë në oborrin e shtëpisë në Watertown të Massachusetts-it. I karakterizuar nga gjendja normale në spitalin e Bostonit, 19-vjeçari i dyshuar ka komunikuar me autoritetet. Tashmë ai do të ketë edhe prindërit të pranishëm.

Top Channel