Indi, përdhunohet një 5-vjeçare

Vajza u mor peng ditën e hënë dhe u sulmua seksualisht në një dhomë të mbyllur për më shumë se 48 orë, njoftoi policia.

Raportimet thonë se ajo u shpëtua nga një kalimtar i rastit, i cili e dëgjoi teksa qante gjatë ditës së mërkurë. Asnjë i arrestuar nuk është bërë deri më tani.

Vajza 5-vjecare është dërguar në një spital të qytetit në kushte serioze për jetën. “Vajza ishte e traumatizuar kur u soll këtu. Ka dëmtime në buzë, në nofulla dhe në gjoks. Dëmtime ka edhe në qafë gjithashtu”, tha Bansal, shef i spitalit Swami Dayanand për mediat vendase.

Zëdhënësi i policisë së Delhit, Rajan Bhagat, tha për agjencinë e lajmeve AFP se policia ka nisur hetimin për rrëmbimin dhe përdhunimin e vajzës, ndaj së cilës janë “përpjekur edhe ta vrasin”.

Menjëherë kanë nisur protesta jashtë spitalit ku është duke u trajtuar vajza e mitur.

Një rast i ngjashëm në dhjetor, kur një studente u përdhunua nga një bandë në një autobus, nxiti protesta të dhunshme në të gjithë Indinë.

Në një ngjarje të vecuar, policia në Delhi tha se janë duke kërkuar për një grup individësh, të cilët akuzohen për përdhunimin në grup ndaj një tjetër 19-vjecareje, gjatë natës së të mërkurës.

Raportimet thonë se gruaja, e cila punon si një ndihmëse familjare, iu ofrua transporti me makinë nga grupi i meshkujve e më pas u përdhunua.

Top Channel