Luftanija amerikane mbërrin në Singapor
18/04/2013 00:00
Sulm me dronë pranë kufirit me Venezuelën, gjashtë ushtarë të vrarë, dhjetëra të plagosur në Kolumbi 19/12 22:54
Një anije luftarake amerikane ka mbërritur në Singapor, në kuadër të
planit të Shteteve të Bashkuara për të rritur praninë ushtarake në
rajonin e Azisë.
Anija “USS Freedom” do të qëndrojë në Azinë jug-lindore për 10 muaj, duke iu bashkuar Flotës së 7-të amerikane, që është përgjegjëse për mbi 124 milionë kilometra katrorë në Paqësor.
Brenda vitit 2020, 60 për qind e aseteve të marinës së Amerikës do të vendosen në Azinë e Paqësorit, në një kohë kur forcat e saj do të largohen nga Iraku dhe Afganistani.
“Bëhet fjalë për ribalancimin e politikës së Shteteve të Bashkuara kundrejt Azisë”, thotë Nicholas Fang, drejtor ekzekutiv i Institutit të Çështjeve Ndërkombëtare të Singaporit.
“Shtetet e Bashkuara dëshirojnë të mbajnë një linjë tregtare detare të qëndrueshme, që është e rëndësishme për tregtinë globale dhe ekonominë amerikane, por që tregon edhe angazhimin për stabilitetin në rajon”, vlerëson Fang.
Sipas marinës së SHBA, Flota e 7-të amerikane mbulon zonat detare të 35 vendeve, përfshirë Kinën, Korenë e Veriut dhe atë të Jugut, të cilat ndodhen në një moment tensioni. Shtëpia e flotës në fjalë është porti Jokosuka, në Japoni.
E vendosur në bazën detare Çangi, në lindje të Singaporit, “USS Freedom” duket si një anije e madhe, por në fakt ajo është më e vogla e anijeve luftarake që zotërojnë Shtetet e Bashkuara. Kina i shikon këto lëvizje si shqetësuese.
Top Channel
