Izraeli: Gati të reagojmë ndaj Sirisë

Ai tha se nëse terroristët marrin nën kontroll armë antiajrore dhe kimike, atëherë në rajonin e Lindjes së Mesme do të “ndryshojë loja”. Netanyahu, në një intervistë ekskluzive për BBC, deklaroi se shqetësimi i Izraelit është “cilët rebelë dhe cilat armë?”.

“Armët kryesore që përbëjnë shqetësimin tonë janë armët që tashmë janë në duart e Sirisë. Bëhet fjalë për armë anti-ajrore, kimike dhe të tjera shumë, shumë të rrezikshme, që mund të ndryshojnë lojën”, deklaroi Netanyahu.

“Ato do të ndryshojnë kushtet, balancën e pushtetit në Lindjen e Mesme dhe mund të përbëjnë një kërcënim terrorist në shkallë globale. Është padyshim në interesin tonë të mbrojmë veten, por gjithashtu në interesin e vendeve të tjera”, vijoi kryeministri izraelit.

Së fundmi janë rritur thirrjet drejtuar komunitetit ndërkombëtar për të armatosur rebelët sirianë që luftojnë kundër presidentit Bashar al Assad, i cili ka thënë se nuk ka ndërmend të dorëzohet.

Por nga ana tjetër ekziston frika se militantët islamikë mund t’i përdorin këto armë për qëllimet e tyre personale. Izraeli ka deklaruar se politika e tij nuk është përfshirja në konfliktin sirian, por së fundmi ka reaguar ndaj sulmeve siriane në zonat e kontrolluara prej tij në Lartësitë Golan.

Top Channel