Ndryshime në rregulloren e vizave

Me 33 vota pro, 7 kundër dhe 3 abstenim, Komisioni Parlamentar për Çështjet e Sigurisë, lirisë dhe drejtësisë miratoi amendimet e reja, duke kthyer nga fillimi negociatat ndërinstitucionale për mekanizmin ndëshkues.

“Jam shumë i kënaqur me mbështetjen e shumicës së grupeve në këtë komitet për tekstin e miratuar. Ky pozicion na jep forcë në mënyrë që të hapim menjëherë procesin negociues me Këshillin dhe Komisionin me qëllim arritjen e marrëveshjes ndërinstitucional që të gjithë ne dëshirojmë”, deklaroi raportuesi spanjoll Agustin Diaz de Mera Garcia Consuegra.

Megjithëse jo e pranishme gjatë votimit në Bruksel, pasi ndodhet në një vizitë dy ditore në Prishtinë, eurodeputetja Tanja Fajon përshëndeti votimin nëpërmjet një deklarate për shtyp.

“Ne vërejtëm me zhgënjim se në vende anëtare të BE-së mbizotëroi shpesh interesi kombëtar, mosrespektimi i marrëveshjeve dhe një nivel i caktuar populizmi, i cili u kthye madje në një kërcënim ndaj popujve të Ballkanit për rikthimin e vizave, si dhe në një shantazh ndaj institucionit tonë. Pas vendimit të sotëm e për një farë kohe, Bashkimi Europian nuk do ta ketë ende mundësinë  të pezullojë përkohësisht regjimin e lëvizjes së lirë”, tha Fajon.

Sipas burimeve nga Parlamenti Europian, rinisja e negociatave trepalëshe me Këshillin dhe Komisionin mbi ndryshimet e reja të propozuara, do ta shtynte të paktën edhe për një vit tjetër miratimin e mundshëm të mekanizmit pezullues.

Pergatiti: Arta TOZAJ, Bruksel

Top Channel