Papa refuzon apartamentin
27/03/2013 01:20
Konflikti i armatosur në Lindjen e Mesme, analiza: Uashingtoni i pakënaqur me qëndrimin e Turqisë ndaj Hamasit 26/11 16:16
Apartamenti papnor është gati, por Shenjtëria e Tij Françesku preferon të vazhdojë të banojë në rezidencën e Shën Martës në Vatikan, atje ku jetuan kardinalët gjatë Konklavës.
Lajmi, i dhënë më parë nga e përditshmja argjentinase “La Nacion”, u konfirmua edhe nga drejtori i zyrës së shtypit të Selisë së Shenjtë, At Federico Lombardi.
Ai shpjegoi se Papa ka lënë të kuptohet se dëshiron të banojë me të tjerët; është zhvendosur nga dhoma ku qëndronte gjatë Konklavës dhe tani jeton në një apartament më komod.
Aktualisht, ai jeton në të ashtëquajturën “suite 201”, e cila ka një sallon pritjeje për të ftuarit e Papës. Gjithsesi, përfundoi At Lombardi, Papa Françesku po eksperimenton këtë formë bashkëjetese të thjeshtë dhe normale, me priftërinjtë e tjerë që punojnë në Vatikan.
Kështu ai do të ketë mundësi të takojë më shumë njerëz, të shkëmbejë mendime e të ndajë edhe tryezën me ta. Vendim ky që pritej, ndoshta nga çasti kur Ati i Shenjtë hapi apartamentin papnor, me shtatë dhoma dhe një kishëzë private, në Pallatin Apostolik, dhe komentoi: Këtu ka vend për 300 persona!
Ky akt i Papës do të ishte një tjetër sinjal i fortë ndryshimi. Prej vitit 1903, të gjithë papët kanë jetuar në këtë apartament, ndërsa më parë, në ambjente të tjera të Pallatit Apostolik të transformuar në muze.
Top Channel
