Greqi, thellohet më tej kriza

Sipas shifrave, në muajin nëntor të vitit 2012 papunësia në Greqi arriti në 27 për qind, që është edhe kuota më e lartë në Bashkimin Evropian. Gjithashtu, papunësia tek të rinjtë nga mosha 15 deri 24 vjeç ka arritur statistikën tjetër rekord prej 61.7%.

Ndërkohë, një raport për krizën i këtij instituti tregoi se ekonomia greke është tkurrur me 6% në tremujorin e katërt të vitit të kaluar, ndërsa reçesioni për të gjithë vitin 2012 ka qenë në shifrën prej 6.5%, shumë më i lartë se parashikimet.

Gjithashtu, sipas raportit të fundit të Institutit të Punës, 3.9 milionë greke ndodhen nën kufirin e varfërisë, 800.000 më shumë se një vit më parë, pasi nga viti 2010 deri më sot pagat në të gjithë sektorët janë ulur deri në 50%, ndërsa çmimet, jo vetëm që qëndrojnë të pandryshuara, por kanë edhe tendencë rritjeje.

Karakteristik është fakti se edhe sistemi i ri i tatimeve ka bërë që të shtohet me mbi 500 milionë euro tatimi mbi të ardhurat e qytetarëve, ndërsa janë pakësuar me 1.1 miliard euro taksat e bizneseve. Greqia mban gjithashtu edhe rekordin për numrin e protestave qe kanë qenë mesatarisht gati 15 në ditë përgjate vitit të kaluar në të gjithë vendin.

Analistët shprehen se qeveria e koalicionit trepartiak është e suksesshme vetëm në vendosjen e masave financiare, ndërsa vendi ka nevojë për investime dhe reforma strukturore, pasi PBB është reduktuar në këto katër vjet me 25%, një shifër kjo e paparë në asnjë vend europian që pas Luftës së Dytë Botërore.

Në intervistën e fundit dhënë BBC, lideri i së Majtës Radikale dhe kreu i opozitës Aleksis Tsipras, duke iu referuar këtyre të dhënave shokuese që ka sjellë programi i reformave të imponuara nga kreditorët e vendit, e cilëson kabinetin Samaras si qeverinë më të djathtë dhe më ekstreme që prej juntës së vitit 1974, pasi po ushtron politikën më barbare për qytetarët e saj duke krijuar një klimë frike dhe terrori në shoqërinë greke.

Top Channel