Maratona Thaçi-Daçiç për veriun

Sipas Kryeministrit të Kosovës, Hashim Thaçit, ndërkohë që qeveria e Serbisë pritet të angazhohet për çmontimin e strukturave paralele të sigurisë në veri, qeveria e Kosovës është e gatshme të integrojë komunitetin serb në nivelet lokale dhe qëndrore të institucioneve të Kosovës, si dhe të respektojë vullnetin e këtij komuniteti për të zgjedhur udhëheqësit e tij.

Për homologun serb Ivica Daçiç, normalizimi i gjendjes në veri shërben për përfitimin e shpejtë nga Serbia të një date për nisjen e negociatave për anëtarësim me Bashkimin Evropian.Në qëndrimet e tyre, Thaçi dhe Daçiç përsëritën se në çdo hap do të respektojnë kushtetutat respektive.

Sipas një komunikate për shtyp nga zyra e Përfaqësueses së Lartë të BEsë, në takim u arrit edhe një marrëveshje e përkohshme për mbledhjen e taksave doganore, akzicës dhe TVSHsë në pikë-kalimet mes dy vendeve.

Në të njëjtën komunikatë Catherine Ashton njofton se në takimin e ardhshëm, i cili pritet të mbahet në mes të muajit shkurt, Thaçi dhe Daçiç janë pajtuar të zhvillojnë një dialog intensiv për zgjidhjet për veriun e Kosovës.

Pergatiti: ERNEST BUNGURI

Top Channel