Barack Obama takon Karzain

“Duke nisur këtë pranverë, ushtarët tanë do të kenë një mision tjetër; trajnimin, këshillimin dhe ndihmën për forcat afgane. Do të jetë një moment historik dhe një hap përpara drejt sovranitetit të plotë të Afganistanit”, tha Obama.

“Jam shumë i lumtur të degjoj nga presidenti amerikan, siç diskutuam edhe më herët, se në pranverë të këtij viti forcat afgane do të jenë plotësisht përgjegjëse për të garantuar sigurinë dhe mbrojtjen e popullit afgan”, u shpreh Karzai.

Ndryshimi i rolit të trupave amerikane këtë pranverë do të bëhet disa muaj përpara mesit të 2013-s, afat që u caktua në samitin e Çikagos, vitin e kaluar.

Presidenti amerikan, Barak Obama, tha se ushtarët do të qëndrojnë në Afganistan përtej 2014-s, vetëm me ftesë të qeverisë afgane dhe sipas një marrëveshjeje, që do t’u garantojë imunitet nga ligjet e vendit.

Ai përforcoi qëllimin për të shpartalluar mbetjet e Al Kaedës, duke thënë se SHBA është shumë pranë arritjes së këtij objektivi.

Karzai dhe Obama do të punojnë për një pakt dypalësh për sigurinë, sa më shpejt të jetë e mundur. Komandantët amerikanë folën për 6000 deri në 15 mijë trupa, që do të qëndrojnë në Afganistan.

Obama dhe Karzai, gjatë deklaratës së përbashkët, thanë se progresi i forcave afgane ka tejkaluar çdo pritshmëri. Tani ata drejtojnë 80% të operacioneve dhe, prej muajit shkurt, pritet t’i grantojnë siguri 90% të popullsisë afgane.

Të premten, Karzai konfirmoi se do të japë dorëheqjen si president, ashtu siç pritej, në fund të mandatit në vitin 2014. Dy udhëheqësit mbështetën nisjen e bisedimeve në Doha të Katarit, mes qeverisë afgane dhe krerëve talebanë, si dhe dorëzimin e stafetës për kujdestarinë e të burgosurve qeverisë afgane, një hap i vështirë, sipas Karzait, për sovranitetin e vendit të tij.

Top Channel