Turqi, Gjykata e Lartë kundër Erdogan

Këshilli i Lartë i Gjykatësve dhe Prokurorëve, në një deklaratë të publikuar në media ditën e premte, theksoi se qeveria po minon lirinë e drejtësisë, duke shkelur parimin e sanksionuar qartë në kushtetutë të ndarjes së pushteteve.

Sipas Këshillit, vendosja e këtij institucioni të pavarur në varësinë e Ministrisë së Drejtësisë i jep fund përfundimisht lirisë së gjyqësorit në Turqi.

Aktualisht, reforma është duke u debatuar në parlament, ku Partia Popullore e kryeministrit Recep Tayyip Erdogan gëzon një shumicë të fortë.

Gjatë javëve të fundit, disa aleatë të Erdoganit janë arrestuar në kuadrin e një hetimi madhor anti-korrupsion, ndërsa një numër drejtuesish policie janë hequr nga detyra.

Shumë analistë e shohin këtë fushatë si një “kryqëzatë” të kryeministrit kundër kundërshtarëve të tij politikë dhe pjesë e “inatit” të Erdogan duket se është bërë edhe drejtësia.

Aktualisht, kundërshtari kryesor i kryeministrit është shndërruar ish-aleati Fethullah Gulen, i cili gëzon një mbështetje të gjerë në radhët e policisë dhe gjyqësorit.

Gulen është një akademik islamik me shumë ndikim në Turqi, i cili aktualisht jeton në një azil të vetimponuar në Shtetet e Bashkuara të Amerikës.

Top Channel