Grupe të ndryshëm të kryengritësve sirianë janë duke luftuar kundër njëri-tjetrit në qytetin e Alepos, informuan “CNN” korrespondentët brenda qytetit ditën e hënë.
Beteja po zhvillohet në afërsi të një spitali, ku mjekët e ndodhur brenda janë duke trajtuar të plagosurit e secilës palë në mënyrë të paanshme.
Megjithatë, spitali mbetet për momentin i kërcënuar nga një mësymje e mundshme e Ushtrisë së Lirë Siriane apo luftëtarëve fondamentalistë të Shtetit të Levantit dhe Irakut.
“Doktorët po punojnë në mënyrë të paanshme, duke trajtuar të plagosurit e secilës anë”, deklaroi një burim nga Alepo, që deshi të mbetej anonim nga frika e ndonjë hakmarrje të mundshme prej tij.
Ushtria e Shtetit të Levantit dhe Irakut, e cila ka arritur të pushtojë në Irak gjatë javës së shkuar qytetin e Faluxhës, është një prej organizatave terroriste të lidhura me Al-Kaedën me rritjen më të shpejtë gjatë vitit të fundit.
Pjesë e kryengritjes siriane gjatë pothuaj tre viteve të luftës, USHLI-ja vendosi që të shkëputej dhe të luftonte e vetme, njëkohësisht kundër ushtrisë së Bashar al-Assad dhe kryengritësve me qëllime demokratike.
Përballja në Alepo vjen pasi anëtarët e Ushtrisë së Lirë Siriane, forcës kryesore të kryengritjes i dhanë një ultimatum prej 24 orësh militantëve që të largoheshin nga Siria, ndërsa arrestuan 200 anëtarë të kësaj organizate.
“Ne përsërisim që nuk duam dhe nuk kemi nevojë për luftëtarë të huaj në Siri”, përsëriti zëdhënësi i ULS-së, Loauy Mokdad për “CNN”. “Ne nuk duam asnjë grup terrorist në Siri. Ne nuk do t’i lejojmë ata që të themelojnë baza në vendin tonë”, shtoi ai.
Konflikti në Siri, i nisur në Mars 2011 si pjesë e kryengritjeve të nxituara nga Pranvera Arabe, i ka kushtuar jetën mbi 100 mijë sirianëve, ndërsa 40% e popullsisë prej 22 milionë banorësh jeton në kampet e refugjatëve jashtë vendit apo në kushtet e të pastrehëve, në zonat e konfliktit në Siri, pasi banesat e tyre janë shkatërruar nga luftimet.
Top Channel
