Greqi, të tjera lista me emra evazivë

Bëhet fjalë për më shumë se 5200 taksapagues grekë me depozita në Lihtenshtein dhe Luksemburg, me pasuri të palujtshme në Londër dhe me jahte luksoze të ankoruara në portet e Holandës që u janë shmangur vazhdimisht prej vitesh pagesës së taksave të Greqisë.

Madje një prej listave, ajo e depozituesve të Luksemburgut u është dorëzuar organeve greke qysh prej vitit 2007, por asnjë prej qeverive pasardhëse nuk ka mundur të luftojë fenomenin e evazionit fiskal.

Ka mëse tre vjet, bën me dije shtypi i fundjavës, që mbi 600 shtetas grekë të pasur, kanë blerë shtëpi, vila apo apartamente luksoze në zonat më të mira të Londrës për të fshehur të ardhurat e tyre, duke iu shmangur taksave, ndërsa mbi 100 vetë kanë çuar jahtet e tyre lukzose në Holandë, për të mos i deklaruar në Greqi dhe për të përfituar financiarisht.

Pas skandalit me listën Lagarde, Departamenti i Luftës kundër Krimit Ekonomik SDOE, ka filluar të shqyrtojë të gjitha emrat e listave të dërguara prej organeve të këtyre shteteve dhe së shpejti pritet që secili prej tyre të thirret dhe të tatohet në bazë të ligjeve përkatëse.

Sic bëhet e ditur janë mbi 54.000 grekë që kanë depozituar paratë e tyre jashtë Greqisë në vitet 2009-2011 dhe për 31.000 prej tyre konkludohet se kanë kryer evazion fiskal që kap shifrën prej 15 miliard eurosh.

Megjithëse Ministri i Financave ka deklaruar para pak ditësh se nuk do të ketë asnjë amnisti fiskale dhe ka ftuar të gjithë grekët pas stabilizimit të situatës financiare në vend që të sjellin depozitat e tyre në bankat greke, vetëm 500 milion euro janë kthyer, nga përafërsisht 80 miliard që vlerësohet se kanë ikur nga institucionet financiare të vendit përgjatë katër viteve të fundit.

Top Channel