Lideri i Hamas, në Gaza pas 45 vjetësh

Bëhet fjalë për vizitën e parë të kryer nga Mashaal në Territoret palestineze që prej vitit 1967. Ai do të qëndrojë në Gaza për tre ditë.

Mashaal, 56 vjeç, është pritur në terminalin e Rafahut, prej nga ka hyrë në Rripin e Gazës, nga kryeministri i Hamasit, Ismail Haniyeh.

Menjëherë më pas ai është drejtuar për në qytetin e goditur rëndë nga sulmet e fundit izraelite në operacionin “Kolona e Reve”.

Numri 1 i lëvizjes islamike shoqërohet në këtë vizitë nga zëvendësi i tij, Moussa Abu Marzuk dhe në momentin e mbërritjes tha se, “shpreson që Zoti t’i mundësojë martirizimin në Gaza”.

Vizita e tij vjen pak ditë pasi Organizata e Kombeve të Bashkuara votoi për njohjen e Palestinës si një anëtar me statusin e vëzhguesit, një lëvizje e kundërshtuar fuqishëm nga Izraeli dhe Shtetet e Bashkuara të Amerikës.

Në votimin e mbajtur në orët e para të së premtes, SHBA nuk mundi të ushtronte të drejtën e vetos, pasi votimi u realizua në Asamble dhe jo në Këshillin e Sigurimit.

Ashtu siç ishte parashikuar, edhe votimet treguan se Palestina gëzonte mbështetjen e shumicës së vendeve anëtare, duke fituar anëtarësimin pa të drejtë votimi.

Shqipëria ishte një prej 41 vendeve që abstenuan, por 138 shtete votuan pro njohjes së Palestinës, mjaftueshëm për të siguruar njohjen. Vendet që votuan kundër njohjes ishin nëntë.

Top Channel