Argumentet mbrojtëse të Presidentit Morsi lidhur me vendimet e tij dhe kërcënimet për “ndëshkim” nuk trembën protestuesit opozitarë egjiptianë të grumbullohen në sheshet dhe rrugët e Kajros ditën e premte.
Qindra protestues nisën të tuboheshin në sheshin Tahrir dhe në zona të tjera të kryeqytetit. Ata sërish kërkojnë tërheqjen e projekt-Kushtetutës, e thërritur për miratim me anë të referendumit më 15 dhjetor, si dhe anulimin e dekretit të presidentit Morsi që shfuqizon të gjitha institucionet e tjera të pushtetit nga e drejta për të kundërshtuar apo rrëzuar vendimet e tij.
Ndryshe nga një ditë më parë, kur ushtria u thërrit për të mbrojtur pallatin presidencial, protestat e së premtes nisën paqësore. Protestuesit mbanin në duar pankarta kundër presidentit Morsi dhe thërritën “Jo Diktaturë”.
Shqetësim për situatën e krijuar së fundmi në Egjipt ka shprehur edhe Uashingtoni. Vetë Presidenti amerikan Barack Obama ka zhvilluar një bisedë telefonike me presidentin egjiptian Mohamed Morsi, gjatë të cilës ka shprehur shqetësimin e tij për viktimat dhe të plagosurit në manifestimet e ditëve të fundit.
“Të gjithë liderët politikë egjiptianë duhet t’u sqarojnë mbështetësve të tyre se dhuna është e papranueshme”, ka thënë Obama gjatë bisedimit.
Shefi i Shtëpisë së Bardhë ka mirëpritur kërkesën për dialog që Morsi i ka bërë opozitës, duke vënë në dukje se për të dyja palët ky dialog duhet të zhvillohet pa kushte.
Obama ka ritheksuar se Shtetet e Bashkuara vazhdojnë të mbështesin popullin egjiptian dhe tranzicionin e tij drejt një demokracie që të respektojë të drejtat e tyre.
“Është jetike që liderët egjiptianë të lënë mënjanë dallimet dhe të bien dakord për një rrugë që do t’i mundësojë Egjiptit të ecë përpara”, ka shtuar presidenti amerikan.
Top Channel