Skandali “Petraeus” përfshin dhe Allen

Sekretari i Mbrojtjes, Leon Panetta deklaroi se FBI raportoi për çështjen në fjalë në Pentagon ditën e diel. Gjenerali Allen, që mohon të ketë bërë shkelje, do të qëndrojë gjithësesi në detyrë.

Ndërkohë, presidenti amerikan Barack Obama, me kërkesë të zotit Panetta, ka pezulluar emërimin e gjeneralit Allen për t’u bërë komandanti suprem i NATO-s në Evropë.

Panetta urdhëroi Pentagonin ditën e hënë që të hetojë gjeneralin Allen dhe i kërkoi Komitetit të Shërbimeve Ushtarake të Senatit që të shqyrtojë emërimin e pasardhësit të tij në Afganistan, gjeneralit Joseph Dunford.

Gjenerali Allen ishte në pritje të konfirmimit nga Senati të caktimit të tij si komandant i NATO-s në Evropë. Zoti Panetta vlerësoi punën e gjeneralit në Afganistan, duke thënë se lidershipi i tij ka qenë një “instrument” në arritjen e progresit në luftën kundër talebanëve.

Thuhet se zoti Allen i ka dërguar mesazhe elektronike Jill Kelley, një grua e martuar nga Tampa, e cila është përfshirë në skandalin e Petraeus pasi i tha FBI-së se kishte marrë emaile anonime dhe ngacmuese.

Zonja Kelley thuhet se ka marrë mesazhe kërcënuese nga Paula Broadwell, gruaja me të cilën Petraeus kishte një marrëdhënie jashtëmartesore.

Një oficer i Pentagonit deklaroi se deri në 30 mijë faqe email dhe dokumente të tjera nga komunikimet e gjeneralit Allen dhe zonjës Kelley mes viteve 2010 dhe 2012 po kontrollohen nga Pentagoni.

Top Channel