Veri, protestë për “rojen e urës”

Ata protestuan kundër arrestimit të Sllavolub Joviç, që sipas Policisë së Kosovës është rrëmbyer nga autoritetet e Beogradit në pjesën veriore të Kosovës.

Joviç, i cili njihet si lider i të ashtuquajturave “Rojat e Urës”, i është caktuar masa prej 30 ditësh paraburgim në Serbi. Sipas Marko Jakshiç, kryetar i Këshillit nacional serb, arrestimet po bëhen për ta dobësuar rezistencën e tyre.

“Për krijimin e kufijve të rinj, të cilët po krijohen tani nëpërmjet bisedimeve, ne nuk kemi kë tjetër të akuzojmë përveç presidentit të Serbisë, Tomoisllav Nikoliç”, ka thënë Jakshiç, duke shtuar se e tërë kjo quhet “tradhëti”.

Ndërkohë, sipas zëdhënësit të Policisë së Kosovës për Mitrovicën, Besim Hoti, gjatë protestës nuk është raportuar ndonjë incident.

Gjatë tubimit u dëgjuan edhe këngë nacionaliste, ndërsa mbi urën kryesore të lumit Ibër pati edhe prezencë të shtuar të të forcave të sigurisë, Policisë së Kosovës, KFOR-it dhe EULEX-it.

Një ditë më parë komandanti i trupave paqeruajtëse, Volker Halbauer deklaroi se KFOR nuk kishte informacion nëse Sllavoljub Joviç është rrëmbyer apo jo nga strukturat serbe.

Top Channel