Pasojat shkatërruese të Sandy-t

Mbi 80 persona kanë humbur jetën, 37 prej tyre në New York City dhe shumë të tjerë konsiderohen të humbur. Shumë prej banorëve shpërfillën thirrjet apo paralajmërimet e autoriteteve për të mos dalë nga shtëpia.

Rreth 4.6 milionë persona ende nuk kanë energji elektrike. Në të gjithë rajonin e goditur ka mungesa të karburantit.

Në New York nisi të funksionojë shërbimi i metrosë, megjithëse 4 nga shtatë tunelet janë ende të mbuluar nga uji. Tre aeroportet, La Guardia, Xhej Ef Kej dhe Njuark vijuan shërbimet e tyre si normalisht. Guvernatori i New York-ut, Endrju Kuomo, urdhëroi të enjten Gardën Kombëtare të shpërndajë ndihma për një milionë banorët e prekur nga stuhia. Ai vendosi në krye të përparësive; të moshuarit dhe të vobektët.

Kuomo shpalli gjendjen e emergjencës për transportin. Të enjten dhe të premten, udhëtarët nuk do të kenë nevojë për bileta.

Kryebashkiaku i New York-ut, Majkëll Blumberg, deklaroi publikisht mbështetjen për Barak Obamën. Sipas tij, ai ka dëshmuar aftësi drejtimi për çështjet që lidhen me ndryshimet klimaterike, të cilat po shkaktojnë stuhi të fuqishme, siç ishte dhe Sandy.

Në New Jersey, mbi 20 mijë banorë kanë mbetur të bllokuar në shtëpi. Garda Kombëtare po ndihmon në shpërnguljen e tyre. Në Jersey City është vendosur ora e ndalim-qarkullimit. Sipas firmës EQECAT, kostoja e stuhisë është 50 miliardë dollarë, dy herë më shumë se shifra që qarkullonte më parë.

Top Channel