Kina paralajmëron Japoninë

Paralajmërimi u bë nga zëvendësministri i Punëve të Jashtme, Zhang Zhijun, në prezencë të homologut të tij japonez.

Deklarata u publikua e plotë në faqen zyrtarë të Ministrisë së Jashtme të Kinës.

Më parë gjatë ditës, në një ceremoni madhore, Kina përuroi aeroplanmbajtësen e saj të parë, ndërsa peshkarexha tajvaneze lundruan deri pranë ishujve Senkaku, për të protestuar edhe ato për shkeljen e sovranitetit të vendit të tyre.

Tajvani është shteti i tretë që pretendon ishujt.

Tensionet në këtë zonë delikate të Azisë kanë qenë të larta, që kur Japonia bleu ishujt nga pronari i tyre i ligjshëm më parë gjatë muajit shtator.

Kjo mënyrë e vendosjes së këtij territori nën sovranitetin kombëtar konsiderohet si e paligjshme dhe “kërcënuese” për rendin botëror nga Pekini zyrtar.

Kinë, gati aeroplanmbajtësja e parë

Në Kinë ka hyrë në shërbim aeroplanmbajtësja e parë, ka bërë të ditur Ministria e Mbrojtjes në Pekin.

Anija e gjatë 300 metra, e quajtur “Liaoning”, sipas emrit të provincës ku u restaurua, është një model sovietik i blerë nga Ukraina.

Për momentin anija nuk ka kapacitete operative dhe do të përdoret vetëm për stërvitje, por autoritetet kineze thonë se objekti, që u është nënshtruar testeve të shumta detare, do të rrisë kapacitetet e tij për të mbrojtur interesat e vendit.

Njoftimi për anijen vjen në një moment kur Japonia dhe vende të tjera të Azisë kanë shprehur shqetësimet e tyre për rritjen e fuqisë detare të Kinës.

Kina dhe Japonia kanë nisur një luftë diplomatike për ishujt e diskutueshëm në Detin Lindor të Kinës. Vende të ndryshme të kontinentit pretendojnë sovranitetin mbi ishujt.

Anija “Liaoning” fillimisht i është dorëzuar marinës në një ceremoni të ndjekur nga liderët kryesorë të superfuqisë aziatike në portin e Dalianit, ka bërë të ditur agjencia “Xin  Hua”.

“Pajisja me këtë aeroplanmbajtëse do të sjellë një rritje domethënëse të kapaciteteve luftarake të vendit, për t’i çuar në nivel modern”, thuhet në deklaratën e Ministrisë së Mbrojtjes.

Azi, varkat tajvaneze në Detin Lindor

Dhjetëra varka tajvaneze lundruan drejt ishujve të diskutueshëm në detin e Kinës Lindore, në shenjë proteste, ndërkohë që diplomatë të lartë japonezë e kinezë takoheshin në Pekin për të ulur tensionet.

Ishujt, të quajtur Senkaku në Japoni dhe Diaoju në Kinë, kontrollohen nga Japonia por sovraniteti mbi ta pretendohet edhe nga Kina e Tajvani.

Tensionet në rajon kanë qenë të larta që kur Japonia deklaroi se do t’i blinte ishujt nga pronari i tyre privat japonez. Varkat tajvaneze, përfshirë disa të rojës bregdetare, tani janë larguar nga zona.

Ndërkohë, zëvendësministri i Jashtëm japonez, Chikao Kaëai, që ndodhet në Pekin për një vizitë dyditore, po takohet me homologun kinez Zhang Zhijun, për të qetësuar ujërat pas protestave anti-japoneze të mbajtura në qytetet kineze.

Anije mbikëqyrëse kineze dhe varka peshkimi kanë lundruar gjithashtu rreth ujërave të ishujve në ditët e fundit, pas njoftimit të qeverisë së Tokios se do t’i blejë ishujt.

Një zëdhënës i rojës bregdetare tajvaneze tha për BBC se 58 varkat mbërritën në ujërat e diskutueshme rreth orës 05:00 me orën lokale, pasi ishin nisur nga një port verior tajvanez ditën e hënën.

Varkat e peshkimit shoqëroheshin nga shumë varka të rojës bregdetare. Flota u kthye në Tajvan pasi qëndroi në zonë për disa orë, raportojnë mediat ndërkombëtare.

Top Channel