Fusnota, SHBA dhe BE vlerësojnë Serbinë

Ambasadorja amerikane në Beograd, Mary Warlick ka deklaruar se vendimi i qeverisë serbe dëshmon se Beogradi zyrtar po bën progres në zbatimin e marrëveshjeve të arritura në bisedimet me Kosovën.

“Shpresojmë që ky të jetë një hap përpara në pjesëmarrjen e përfaqësuesve të qeverisë së Serbisë në takimet rajonale. Ne e përshëndesim këtë”, ka deklaruar Warlick.

Sipas “RTK”, vendimi është përshëndetur edhe nga Bashkimi Evropian, që e ka cilësuar atë si një hap të rëndësishëm dhe konstruktiv në marrëdhëniet Serbi-Kosovë.

“Kjo mundëson pjesëmarrjen e të gjitha palëve në bashkëpunimin rajonal”, ka deklaruar Maja Koçijançiç, zëdhënëse e Përfaqësues së Lartë të BE-së, Catherine Ashton.

Zëdhënësja ka nënvizuar se Beogradi dhe Prishtina duhet të implementojnë marrëveshjet e arritura deri tani në bisedimet dypalëshe, në mënyrë që të përparojnë në proçeset integruese.

Një ditë më parë, kryeministri serb Ivica Daçiç deklaroi se, çështja e fusnotës është një betejë e humbur për Serbinë. Për rrjedhojë, qeveria e Serbisë aprovoi të hënën një sygjerim ku thuhet se fusnota për Kosovën nuk është e detyrueshme.

Top Channel