Presidenti amerikan, Barack Obama po ushtron presion ndaj qeverive të Eurozonës të mbajnë Greqinë brenda zonës së monedhës së përbashkët të paktën deri në zgjedhjet presidenciale të 6 nëntorit në SHBA.
Kështu shkruan tabloidi anglez, The Independent duke iu referuar burimeve nga brenda qeverisë britanike.
Përfaqësuesit e asaj që njihet tashmë si Trojka, (FMN, BE, BQE) pritet të vizitojnë Athinën në muajin shtator ndërsa në 8 tetor do të mbahet mbledhja e Ministrave të Financave të Eurozonës ku do të vendoset nëse Greqisë do t’i jepet kësti i radhës i ndihmës prej 31 miliard eurosh apo jo.
Nëse Bashkimi Europian, Banka Qendrore Europiane dhe Fondi Monetar Ndërkombëtar vendosin se Greqia nuk ka bërë mjaftueshëm në reformat e saj ekonomike dhe financiare për të merituar ndihmën, kjo do të përkthehej në dalje automatike nga Eurozona të Athinës.
Kjo shqetëson zyrtarët amerikanë të cilët i tremben daljes së Greqisë që do të pasonte me kaos në tregjet ndërkombëtare. Destabilizimi i tregjeve pak javë para 6 nëntorit, sigurisht që nuk do të ndihmonte presidentin Obama në misionin e tij për t’u rizgjedhur në krye të Shtëpisë së Bardhë.
Po sipas tabloidit britanik, liderët europianë pritet të mbështesin kërkesën e Obama-s, nisur nga programi i rivalit të tij Mitt Romney, që parashikon një politikë më izolacioniste për Shtetet e Bashkuara në një moment kur Eurozona dhe gjithë Bashkimi Europian ka nevojë për ndihmën dhe bashkëpunimin e Uashingtonit.
Top Channel
