Vapa përcëllon Maqedoninë

Për shkak të nxehtit, Ministria e Punës dhe Politikës Sociale ka rekomanduar që në dy ditët e ardhshme, punëdhënësit të kujdesen për punëtorët e tyre dhe të shmangin punët në vende të hapura gjatë periudhës kohore nga ora 11 deri në ora 17.

“Të gjithë punëdhënësit që nuk e respektojnë ndalesën për punë nga ora 11 deri në orën 17 në vende të hapura do të  sanksionohen. Inspektorët e punës do të mbykqyrin se sa respektohet kjo ndalesë dhe ju siguroj se do të ndëshkohen të punëdhënësit pavarësisht nëse bëhet fjalë për institucione publike apo subjekte private”, deklaroi Spiro Ristovski, ministër për Punë dhe Politikë Sociale në Maqedoni.

Edhe nga Ministria e Shëndetësisë bëjnë thirrje që qytetarët të kenë kujdes dhe të mos të ekspozohen në vende me diell.

Për të parandaluar pasojat nga temperaturat e larta nëpër rrugët e Shkupit po patrullojnë automjete të Kryqit të Kuq që u ofrojnë ndihmë falas qytetarëve që kanë nevojë.

Një vullnetare e Kryqit të Kuq, Maja Paceva, u shpreh: “Po shpërndajmë ujë falas për të freskuar qytetarët dhe këshilla për të evituar rrezikun nga nxehti. Po ashtu, në rast nevoje me transportin tonë i dërgojmë qytetarët në spital ose nëpër shtëpitë e tyre”.

Në këto temepratura të larta nuk mungojnë as zjarret. Nga Qendra për Menaxhim me Kriza, njoftojnë se zjarre kanë shpërthyer në disa zona malore të Shkupit dhe Tetovës. Muajin e kaluar, tre persona kanë humbur jetën dhe disa të tjerë janë lënduar, si pasojë e zjarreve që përfishinë Maqedoninë Lindore.

Top Channel