Kukës, vëllai vret vëllanë

Burime nga Policia e Kukësit pohojnë se viktima është gjetur nga familjarët e tjerë në orën 00.45, duke u gdhirë dita e martë, i rrëzuar para derës së shtëpisë në gjendje kritike. Familjarët menduan se ai mund të ishte rrëzuar dhe kishte humbur ndjenjat. Me shpejtësi e dërgojnë në spital, ku me gjithë ndihmën e parë 32-vjeçari nuk u mbijeton plagëve.

Mjekët ligjorë

Fillimisht ngjarja është cilësuar aksidentale dhe policia dyshonte se viktima kishte marrë goditje me sende të forta në kokë. Ky version është rrëzuar nga Nikolin Martini, mjekoligjori që asistoi në këqyrjen e trupit të viktimës, i cili pohoi për gazetën se 32-vjeçari kishte një frakturë pas kokës. Me ndihmën e ekspertëve nga Tirana është konfirmuar se Mataj është vrarë. Burime nga Policia e Kukësit pohojnë se ngjarja u klasifikua si vrasje dhe menjëherë filluan verifikimet për gjetjen e autorëve. Grupi hetimor ka marrë në pyetje dhjetëra persona që kishin parë viktimën disa çaste para se të gjendej i masakruar në derën e shtëpisë. Informacionet e para konfirmuan se familja Mataj nuk ka konflikt dhe se viktima ishte njeri pa precedentë dhe nuk njihej se ishte i përfshirë me kontingjent kriminal.

Hetimet

Megjithatë, verifikimet e mëvonshme do të zbardhnin këtë ngjarje. Banorët e zonës pranë vendngjarjes pohuan për policinë se janë dëgjuar dy të shtëna pistolete në afërsi të vendit ku ndodhi vrasja. Ata konfirmuan se vrasësi mund të ketë shkëmbyer debate me viktimën dhe më pas e ka qëlluar. Pas këtyre verifikimeve dhe dëshmive në vendngjarje, grupi hetimor ka ngritur dyshimet se vrasja mund të jetë realizuar nga një pjesëtar brenda familjes. Agjentët e policisë kanë shkuar në ceremoninë e varrimit të 32–vjeçarit, i cili kishte një javë që ishte fejuar, dhe vëzhguan lëvizjet e personave të dyshuar. Njëri prej të dyshuarve ishte vëllai i tij, Sokoli, i cili kryente disa lëvizje që ranë në fokusin e agjentëve. Policia kërkoi dëshminë e Sokolit për versionin e ngjarjes dhe gjatë deponimeve pranoi pa asnjë hezitim se ai ishte autori i vrasjes. Më pas hetuesit e pyetën për armën e krimit dhe autori pohoi se pistoletën e kishte lënë te vjehrri i tij, i cili banonte në qytetin e Kukësit. Ekspertët e kriminalistikës kryen veprime pranë vendngjarjes ku gjetën edhe një pistoletë që do të shërbejë si provë për ngjarjen. Policia pohon se “kyçi” i zbardhjes së kësaj ngjarjeje kanë qenë dy ekspertët mjekoligjorë të ardhur nga Tirana, të cilët kryen autopsinë e viktimës. Ndryshe nga versioni i familjarëve se ngjarja mund të ishte aksidentale, ekspertët gjetën në kafkën e 32-vjeçarit dy predha pistolete. Këtu kanë lindur dyshimet se krimi ka ndodhur brenda familjes. Vetë autori e pranon vrasjen, ndërsa nuk jep shpjegime mbi motivin. Duke parë se vrasja ka ndodhur para derës së shtëpisë, policia dyshon se vrasja mund të jetë kryer për motive xhelozie.

Top Channel