Greqi, qeveria fiton votëbesimin

Koalicioni siguroi aprovimin e të gjithë deputetëve të tre partive anëtare të koalicionit, që synon ta mbajë Greqinë në euro.

Ministrat e eurozonës pritet të takohen ndërkohë në Bruksel për të diskutuar mbi zbatimin e masave për të cilat u ra dakord në samitin e qershorit, për të frenuar krizën e borxhit.

Ndasitë mes veriut dhe jugut të eurozonës ka ditë që kanë rënë në sy përsa i përket mënyrës së implementimit të vendimeve të arritura në këtë samit.

Gjatë takimit, liderët e BE-së ranë dakord për të përdorur fondin e ndihmës së eurozonës për të mbështetur bankat në vështirësi në mënyrë direkte, duke mos ndikuar tek borxhet e qeverive.

Spanja dhe Italia dëshirojnë që marrëveshjet të hyjnë në fuqi sa më parë të jetë e mundur, por shtete të tjera, në veçanti Finlanda dhe Holanda, janë kundër lëvizjeve drejt përgjegjësive kolektive për borxhet e vendeve të tjera.

Ditën e premte, kostoja e huave të Italisë dhe Spanjës u rrit ndjeshëm, duke u ngjitur në nivele të konsideruara nga ekspertët si të paqëndrueshme.

Ditën e shtunë kryeministri spanjoll Mariano Rajoy bëri apel për zbatimin sa më shpejt të jetë e mundur të marrëveshjeve të arritura në samitin e qershorit.

Top Channel